SHILLONG: West Jaintia Hills a·jani Mukroh songo songdongenggipa Khasi-Pnar manderangko ‘niam gri songdonggiparang’ ine Karbi Anglong Autonomous Council (KAAC)-ni chief executive membor (CEM) Tuliram Ronghang aganahani gimin, Meghalaya a·dokni Chief Minister Conrad K Sangma-ba raken jegalataha.
“Iandakgipa kattarangko ua aganna nangjachim. Ia jolrango tom·tomaniko rakkina chinga rakbee kamrangko ka·engon uni iandakgipa kattarangko chinga raken jegala. Iandakgipa kattarangara, ia jolrango maming dakeba obostarangko namatna dakchakani ong·jawa,” ine Sangma, Sukrobar salo kobor ra·timgiparangna aganaha.
Iani bidingo ua Assam-ni Chief Minister Himanta Biswa Sarma baksaba agangrikaha aro uaba KAAC CEM-ni agangipa kattarangna namen suk ong·jaha ineba Meghalaya Chief Minister parakataha.
“Iandakgipa kattarangkode dolgnichipaknin agangiparang dongaigen indiba ian sorkarini gisepo ong·enggipa ine darangba chanchijachina. Iandakgipa kattarangko uamang an·tangtangsa aganenga aro iani bidingo anga bang·e aganna nangnikja,” ine Sangma aganaha.
Simao meligrikgijanikode Chief Minister-rangni gadango aro Home Minister-rangni gadangosan agangrikna nanga ineba ua aganaha.
Mukroh-o songdongenggipa manderangni kosako iandakgipa kattarangko agane, dolgnini gisepo ding·chaoataniko ra·bana jotton ka·enga ine KAAC CEM-ni kosako mokordomako ka·china gita Opposition Trinamool Congress (TMC)-ni dilgipa Mukul Sangma, a·dok sorkariko didiangahachim ine nikna man·a.
KAAC CEM-ni iandakgipa kattarangko aganahani gimin KSU aro HYC dolrangko man·chape dingtang dingtang a·dokni dolrangba raken jegalatahachim.