TURA: North Garo Hills a·jani Dainadubi-ko C&RD Block songchina dabienganiko NPP-chi dilenggipa MDA sorkari chu·sokate on·jaengani gimin Mongolbar salo, Dainadubi jolni dingtang dingtang dolrang aro jolo songdongenggipa manderang, Dainadubi jolo donggipa sorkari office-rangko aro dokkanrangko konta 24-na chipe donattokaha.
Bandh-ko Mongolbar pring 6:00 bajioni a·bachengate da·al Budbar pring 6:00 bajiona ong·atenga aro ia bandh-ko Dainadubi Block Demand Committee (DBDC)-ni dilanichi GSU, FKJGP, AAYF, Mothers Union aro uandakgipa dolrang nangrime ong·atangaha.
Konta 24-na bandh-ko ong·atanio Dainadubi jolrango donggipa pilak dokkan aro office-rangko chipe dontokahani gimin, pilak biaprangon bangbang ong·anirangkosa nikna man·angaha.
“Chingni Dainadubi-ko C&RD Block songchina dabianiko sorkari knachakjaengani gimin, sorkarini kosako jegalaniko mesokna da·al konta 24-na chinga pilak dokkan aro office-rangko chipattokaha. Iani bidingo chinga adita salrangna skangan Bangsi Apal skul kal·chakramo tom·e chanchirimangenba, ia bandh-ko ong·atna tik ka·aha,” ine DBDC-ni membor Sanjak Sangma parakataha.
Committee-ko dilenggipa manderangni parakatani gitade, Kharkutta C&RD Block-ni ning·o ga·akgipa dam 54 songrangko aro Resubelpara C&RD Block-ni ning·o ga·akgipa dam 51 songrangko ma·ekate, gital Dainadubi C&RD Block-ko songchina gita uamang, 2018 bilsionin dabiengahachim indiba da·alonan Dainadubi jolo songdongenggipa manderangni dabianiko sorkari chu·sokate on·gija Adokgre-kosa sorkari Block songe on·skaahachim.
“Uni gimin chingni dabianiko sorkari chu·sokate on·jaskal chinga sorkarini kosako jegale jingjengatanirangko dakangkugen,” ine Sanjak Sangma parakataha.