TURA: Re·anggipa Sombar salo, South Garo Hills a·jani Chokpot-o donggipa Krishi Vigyan Kendra (KVK)-ni gita World Soil Day-ko KVK campus-o maniangaha aro ia manianio Chokpot PHE-ni SDO Bilgrak M Marak, mongsonggipa sokgipa ong·e bakko ra·angaha.
Ia program-ko ong·atanio Chokpot-ni ADO Aiarson K Sangma, NABARD-ni DDM Khelchandra Chongtham aro SGH KVK-ni Senior Scientist aro Head Dr Athokpam Haribhushan-ba dongpae bakko ra·angaha.
Ia World Soil Day-ko manianio dingtang dingtang songrangoni game ge·e cha·giparang, skulrango poraienggipa chatro chatrirang aro KVK-o kam ka·enggipa manderang bakko ra·angtokaha aro ia tom·anio Rampragre, Ashugre, Chittimgre, Sembu Rongsnagre aro Mitap Songmong songni manderangna gimik king 89 Soil Health Card-rangko suale on·angjolaha.
Ia salko manianio chatro chatrirangna rong nongsusaanikoba ong·atangaha aro game ge·e cha·giparangna sam satani bosturangkoba suale on·angaha.
Ia salko maniani bak gita technical session-ko ong·atanio KVK-ni Dr Karam Amarjit, Chikko G Momin aro Kenyrocks Ch Marak, game ge·e cha·giparangna a·salrangni gamchatgipa ong·ani bidingo agan-talate on·angskaaha.
