SHILLONG: Meghalaya Eco-Tourism Infrastructure Development Project (MEIDP)-na chamgipa tangka paisarangko jakkatsreta ine adita salrangna skang Trinamool Congress (TMC)-ni national spokesperson Saket Gokhale-ni matnanganiko Budbar salo, Meghalaya IAS Officers Association (MIOA)-ba raken jegalataha.
Budbar salo MIOA-ni dilgiparang tom·e chanchirimangenba, Meghalaya a·doko MEIDP-na chamatgipa tangka paisarangko jakkalsretaha ine Gokhale-ni matnanganiko raken jegalataha.
“MEIDP-ni tangka paisarangko jakkalsreta ine matnanganiara kakket ong·ja aro manderangko dilsretna tol·e matnanganisan ong·aia. Uni iandake matnanggipani bidingo Meghalayan Age Limited-an name talate on·ahachim,” ine IAS officer-rang parakataha.
TMC-ni matnanganio biming mingako man·gipa Planning Department-ni Commissioner & Secretary Dr Vijay Kumar D, Meghalaya Age Ltd-ni CMD aro pilak official-rangnaba MIOA-ni gita bakrimpaaniko parakataha.
“Civil service officer-rangni kamde Indian Constitution aro a·songo dongimin niamrango pangchake, seokako man·gipa sorkarini kamrangko jako ra·e chu·sokatanian ong·a ine Association talataniko on·taina ska. Iandake IAS officer ba je sorkari officer-rangkoba an·tangtangni politics-ni kamrangna ong·gija matnanganiara namen jegalna kragipa kam ong·a,” ine Meghalaya IAS officer-rang parakataha.
Dr Vijay Kumar-ni talatgimin gitan MEIDP-ni kamrangko ka·anio pilak niamrangkon aro ia project-na tangka paisarangko dakchake on·enggipa New Development Bank-ni niamrangko ja·rikaha ineba IAS officer-rang parakataha.
Meghalaya a·doko IAS officer D Vijay Kumar-chi dilenggipa Meghalaya Eco-tourism Infrastructure Development Project (MEIDP)-ni ning·o gong kror 632 tangkarangko jakkalsretaha ine adita salrangna skangsan Trinamool Congress-ni national spokesperson Saket Gokhale matnangatahachim ine nikna man·a.
Chief Minister Conrad Sangma-ni mongsonggipa manderangoni saksa Vijay Kumar-chi dilenggipa Meghalayan Age company-ni ning·o ia tangka paisarangko jakkalsretaha ineba ua matnangatahachim.
