TURA: North Eastern Hill University (NEHU) Tura Campus-ni ning·o donggipa Biotech KISAN Hub-ni Field Demonstration Hub-ko Sukrobar salo NEHU-ni Vice Chancellor Prof Prabha Shankar Shukla a·bachengate on·angaha aro ia unit-ko a·bachengatanio NEHU Tura Campus-ni In-charge Prof Sujata Gurudev, Biotech KISAN Hub-ni Project Coordinator aro NEHU Tura Campus-ni ning·o donggipa Horticulture Department-ni Assistant Professor Dr Arindam Barman baksana gipin official-rangba dongpae bak ra·angaha.
Ia Field Demonstration Unit-ni ning·o Mushroom growing unit, low cost shade net crop growing unit, composting unit, nursery unit, open field cultivation unit, stevia cultivation unit aro gipin unit-rangba donga aro ia Field Demonstration Unit-ko bikotani miksonganiara gama ge·anirango jakkalgipa gital kolrangni bidingo game ge·e cha·enggiparangna skie on·na miksonganian ong·enga.
Ia unit-ni kamrango mongsonggipa kamrangko ka·enggipa manderangara, Biotech KISAN Hub-ni Project Assistant Neha M Sangma aro Biotech KISAN Hub-ni Project Activity Assistant Amy D Shira ong·enga.
Ia Field Demonstration Unit-ni jako ra·enggipa mongsonggipa me·su samjakrangara, Naga jal·lik, Capsicum, baring belati aro uandakgipa me·surangan ong·enga.
