SHILLONG: ‘Azadi Ka Amrit Mahotsav’-ko maniengon, BSF Meghalaya-ni Brass aro Jazz Band mijalo International Border, East Khasi Hills-ni Rama Krishna Mission School Sohbar Punji-o ga·subee aro an·saobee dakmesokangaha.
BSF band, bang·a mingsinggipa a·songna janggi on·chakgiparangni gimin tarigipa gitrangko sul sale sika-moanirangko dakangaha aro knatimgiparangko namen gisiko nangatbeaha. Ia programo sak 450-na batpile skulni chatro-chatrirang bakko ra·angaha. RKM-ni skotong Swami Anurag Nandha Maharaja, programo mongsonggipa sokgipa ong·e bakko ra·aha.
BSF official-rangni aganani gitade, a·songni ku·cholsan ong·ani gimin manderangna gipatna aroba manderangni aro chatro-chatrirangni gisepo a·songna on·kange kam ka·ani gisikrangko gipatna gita miksonga ia Band show-ko dakangaha. Unomitingo December 1-oni 15 tarikona ong·atenggipa India sorkarini a·bachengatgipa ‘Swachhta Pakhwara’-oba manderang bak ra·na ka·oksianikoba paraktokaha.
