SHILLONG: HNLC bobil dolni gitcham general secretary Cheristerfield Thangkhiew-ko so·otani bidingo nanga gita ja·kurangko de·china gita Home department-na a·dokni Cabinet ge·etaniko on·manaha ine Bristibar salo, a·dokni Deputy Chief Minister Prestone Tynsong parakataha.
“Chinga iani bidingo Home Department-na watatmanaha aro uamang Political department-na watatskana nanggen. Iani bidingo Cabinet-o chanchirimna nangani donggenchimode chinga chanchirimgen,” ine Tynsong, mai dakgipa ja·kuko sorkari de·na miksongengachim, uko talatgija, kobor ra·timgiparangna parakataha.
HNLC-ni gitcham dilgipako so·otgipani bidingo Justice (retd) T Vaiphei-ni inquiry dakani report-ko September-ni 9 tariko Assembly-o parakani gitade, Thangkhiew-ni nokko police-rangni chadrapanio nangana bate bilko jakkalahani a·selsa ua so·otako man·ahachim.
Thangkhiew-ko rim·na gita Tactical Team-I-ni chadrapeanio chanchininggija dake kamko ka·ani a·selsa aro nangana bate bilko jakkalani a·selsa ua so·otako man·na nangaha ineba inquiry report-o parakahachim.
Inquiry dakanio pangchakesa a·dok sorkari, iani bidingo nanga gita ja·kurangko de·gen ine adita salrangna skangsan, a·dokni Chief Minister Conrad Sangma-ba parakatahachim.
“Skatangde sorkari ja·kuko de·na man·ja aro judicial inquiry-ni report-ko on·ahaosa nangani kri ja·kuko de·gen,” ine Chief Minister aganahachim.
Inquiry report-o Tactical Team-I-ko dos galahani gimin ia dolni kosako nanga gita sastirangko on·china Ka Sur Ka Bri U Hynniewtrep (KSKBUH) dabiskaengachim.