TURA: Meghalaya Health aro Family Welfare Minister, James PK Sangma, Jengjal Sub-Division-ni ning·o donggipa Manggakgre Sub-Centre-ko Primary Health Centre (PHC)-o dal·dapatna gita mnisalo Manggakgre-o pangchakaniko songe on·aha. Pangchakaniko songe on·ani somoio Tura Sadar SDO, Dr. Abhisekh Gowda, District Medical aro Health Officer, Dr. Bijoy Debbarma, joltangni dilgiparang, Nokmarang aro gipin dilgiparangba dongpaaha.
Pangchakaniko songe on·ani somoio aganengon, songadam nokadamrango nangani kri sanram biaprango sana banani cholrang dongkujaengani gimin, sana bana kamrangko ka·anio manderangni ka·dongsoani gita ong·na man·jaenga ine minister aganaha. Indake sana banani cholrangko nambatatani bidingo gita Health department, chief minister baksa agangrikaha aro manderangni an·seng-baljokanini gimin chanchienba PHC-rangko CHC-rangona aro sub-center-rangko PHC-rango ra·doatna gita chanchiaha ine ua u·iataha.
Ua indakeba u·iataha je Manggakgre-oni Teksragre-ona aro Manggakgre-oni Aigre-ona PMGSY aro CRF-ni ning·o a·bachengatgipa road project, a·jolni manderangni songre-songbatanio namen dakchakani ong·gnok.
Pangchakaniko songe on·ani somoio manderangko rimchaksoani kattako SDO, Tura Sadar, Dr. Abhisekh Gowda dakangaha.
