SHILLONG: Meghalaya-o mikkang bilsi 2023-o ong·nasienggipa Assembly election-rango Trinamool Congress (TMC) ge 60 Assembly seat-gimiko candidate-rangko susaatjanaba donga.
Mijal Robibar-o The Shillong Times songbadna aganao party komibeoba ge 50 Assembly seat-rango susaana nisan ka·enga ine TMC-ni a·gipi dilgipa aganaha.
“Indiba chinga namgipa candidate-rangko man·aosa pangchakaigen. Seat-rango gapatna nangana candidate-rangko chinga dona nangnikjaenga. Chingni candidate-rang warachakgipa political party-rangni candidate-rangko raken dakgrikna nanggen,” a·gipi TMC dilgipa aganaha.
Party tikitko on·anio chena kragipa mongsonggipa kam ong·enga, ua aganaha.
Indake ong·engon ge 60 seat-rang gimikon candidate-rangko dona bang·bata political party-rang neng·nikaniko chagronggen, ua aganaha.
Pilak seat-rango candidate-rangko susaatna Congress ba NPP amjawa, TMC dilgipa aganaha.
United Democratic Party jemangan Garo Hills-o uamangni bilgrianirang dongaonin pilak ge 60 seat-rango susaatna skanggipa party-ni candidate-rangni bimungrangko parakatahachim ua a·doko mongsonggipa a·jolni party-naba neng·nikani ong·enga gita nikenga, ua aganaha.
Christmas-na skang ong·nasienggipa election-rangna uamangni skanggipa candidate-rangni bimingrangko party parakatgen ine TMC dilgipa parakaha.
“Da·o chinga West Bengal-ni Chief Minister aro party-ni dilgipa Mamata Banerjee-ni sal gittam salrangna a·dokona re·banasianio chinga jakchakjaenga ua da·al salni bako re·bana gita sal manchienga,’’ ua agandapaha.
