TURA: Garo Hills-o sondongenggipa manderangna dingtang a·dokko dabidilenggipa Garoland State Movement Committee (GSMC)-ni dilgiparang, Garoland a·dokko dabina gita National Federation of New States (NFSN)-ni salgnina ong·atenggipa program-o bakko ra·na New Delhi-ona re·chakatangaha ine kobor on·aha.
Koborko on·ani gitade, GSMC-ni dilgiparang, Robibar walon, Tura-oni Guwahati-ona re·angaha aro uamang Sombar salni bakon New Delhi-ona re·chakatangaha.
New Delhi-o NFSN-ni program-ko December-ni 14 aro 15 tarikrango ong·atenga aro GSMC-ni dilgiparang ia salgnina ong·atenggipa program-o bakko ra·ani ja·man, Tura-ni MP Agatha K Sangma-koba gronge, Parliament-ni session-o Garoland a·dokni gimin ku·rangko on·china didianggen ine u·iataha.
