AMPATI: Meghalaya Chief Minister Conrad K. Sangma aro Meghalaya High Court-ni Chief Justice Sanjib Banerjee mang mija Sonibaro gital rikgipa District aro Session Court Complex-ko, Ampati, South West Garo Hills-o nokdonggae on·angaha, oprake on·ani somoio MLA Dikkanchi D Shira aro Winnerson D Sangma mangba dongpaaha.
Complex-ko oprake on·ani somoio jinmana aganprakengon, ia gitalgipa building ge·sa in institution gita ong·e a·jolni manderangna namgniko on·gen. “South West Garo Hills-ni manderang ia mongsonggipa aro niksenggipa kamko pangnan gisik ra·gen, jean manderangna kakket bichalko ka·e on·gen’’ ine Chief Minister aaganaha.
A·songo dingtang dingtang system dongani gimin aganengon, “An·chingni Constitution-o, legislative ong·chong, executive ba judiciary ong·chong, dingtang dingtang dolni daito ba dakgniko rongtalen mesoka; aro chingni bil ama gita manderangna dangdike on·na gita chinga iano donga ine chief minister aganaha. Chief Justice-ni dakgni aro kam dingtang donga, aro uandake Chief Minister-ni kamba dingtang,” Pa Sangma agandapaha.
Maming system-ba tiktak ong·gipa dongja ine aganengon, India namen dal·begipa a·song ong·a jeon joltangni aro chengoni ja·rikbaenggipa niamrangba donga aro an·chingni judiciary system uarang baksa tik ong·en kamko ka·enga ineba Chief Minister aganaha.
“Judiciary, da·o pilakni gitan manderangna kakket bichalko on·ani apalbatoroenga. Apsandake ia gitalgipa building-ba court-ni gita kam ka·e manderangna namgniko on·na man·gen ine chinga ka·donga,” ua agandapaha.
Ua indakeba parakaha je A·doko Law University-koba ru·utgijan kulinasienga, jean a·doko poraienggipa chatro-chatrirangna bang·a namgniko on·gen.
Chief minister, ja·mano gital rikgipa buidlingkoba Meghalaya High Court-ni Chief Justice baksa re·roroe niangaha.
