A·doko ge 12 gital college-rangko rikna Cabinet-o tik ka·a

SHILLONG: A·doko gital ge 12 degree college-rangko rikdapna gita de·e pinnikgipako mijalo Meghalaya Cabinet-o ra·chake donangaha.
Meghalaya assembly election-rang ong·na bang·gija jarangna skangskang iako Sorkari parakaha, jeon a·doko mikkang bilsi assembly election-rang ong·nasienga ine nikna man·a.
Cabinet tom·ani ja·mano koborni manderangna parakengon, Capt Williamson Sangma Technical University-ko Capt Williamson Sangma State University ine biming mingjitaniko dakna gitaba Cabinet-o namnike ra·chakaha ine Chief Minister Conrad K Sangma. Ian, Meghalayao a·dokni skanggipa jako ra·gipa university ong·enga.
Unomitingo, College of Teacher Education, Turao B.A. aro B.Com course-rangko a·bachengatna gita de·e mesokgipakoba cabinet-o namnike ra·chakaha. Ia ja·ku de·anio, ge 39 gital post-rangko nakatdapatgen ine Pa Sangma aganaha.
Pa Sangma indakeba aganaha je ia kamrangko New Education Policy (NEP)-o pangchake ka·enga, jeni gitan pilak college-rangon multi-discipline course-rang dongtelna gita ga·akenga.
Iana agreba Shillong Government College of Engineering (SGCE)-na ge 50 aro College of Architecture & Planning Tura (CAPT)-na ge 47 gital post-rangko nakatatna gitaba Cabinet-o namnike ra·chakaha ine CM aganaha.
Pa Sangma-ni aganani gitade, ia ge·gni college-rangko nokrik-nokdakani kamrang 99 per cent mangni gita matchotengaha aro SGCE-na kror 2.8 aro CAPT-na kror 2.7 tangkarangko a·dok sorkari bilsio koros ka·gen.
Ia college-rangko mikkang bilsi ja tong·saonide skanggipa session-rangko a·bachengna man·gnok ine ka·dongsoenga ine chief minister aganaha.
Unomitingo bangbang dongenggipa post-rango gapatna Meghalaya Medical Services Recruitment Board-na porikkarangko ra·na on·na gita Meghalaya Health Services Rules-koba state cabinet-o taridape ra·chakaha ine chief minister aganaha.
Unbaksana, National Human Rights Commission (NHRC)-ni ge·etanio ba mesoke on·anio pangchake undertrial prisoners ba bichalni ning·o ong·enggipa koedirangni sianina tarigipa mingsa compensation policy-koba cabinet-o ra·chakaha ine chief minister aganaha.