Farmers scheme-ni ning·o tangka ong·gipa loan ong·ja, BJP-sa dilsretenga: CM

SHILLONG: A·dok Sorkarini Scheme-rangni ning·o game cha·giparangni on·gipa tangkarang loan-ni tangka ong·ja, uni namgniko man·giparangko BJP-sa tol·e jangatenga ine Meghalaya Chief Minister Conrad K Sangma Mongolbaro aganaha.
BJP, jean a·doko sason ka·enggipa Meghalaya Democratic Alliance, MDA baksa bakrimgiparangoni dolsa ong·achim, mikkang bilsi election-na skang skang game cha·giparangna gong 5,000 ka·e on·gipa tangkarangde loan-sa, ukode bank-na gampilna nanggen ine BJP, re·anggipa antio aganahachim.
Game cha·giparangna on·gipa tangka loan ong·ja, indiba jemangan farmers’ group-rang uamangni bimingrangko segatahachim, uamangnasa bilsio sorkarini suale on·gipasa ine chief minister talataha.
FOCUS aro FOCUS+ programme-chi kangal-cholgrirangna a·dok sorkarini dakchakna jotton ka·anirangko election kal·enga ba election-nasan dakmikenga ine aganako man·skaenga ine a·dok Chief Minister, Conrad K. Sangma aganaha.
“Dakchakaniko nangenggipa manderangna aro game-sue cha·giparangna ong·a ia kattako agananiara ma·sichakgijani ong·a. Ru·uta bilsirangna skangon jekon dakna nangachim uko chinga dakskaenga,’’ Sangma aganaha.
Je mandean indake agana ua kangal-cholgri aro game-sue cha·gipa manderangni gisikko ma·sichakgijagipa ong·a, ua aganaha.
Uni aganani gita na·simang da·alo gamgiparango sing·ode  uamangni janggi tanganiko tang·doatna, chona-rema badingchiwalaniko dakna aro dolrang baksa uamangko dakchakna on·gipa ua tangka maikai uamangna namgni ong·a uamangni agana kattarangko knana man·gen.
Ia programme a·bachenga gadango dal·bea namgniko man·enga, Chief Minister aganaha.
Indake ong·engon, ia programme gimikko 2021 bilsi jatchimango a·bachengataha, Sangma aganaha.
“Uni gimin iako election kal·enga ine agananira chu·gimik ong·srangja. Ian election-nasan dakenga ong·ode chinga da·osa uko sualna a·bachenggenchim. Anga Tura-o ong·mitingon anga ia programme-ko bilsisa atamangna skangon  a·bachengmanaha. Ia kamko ru·uta salna skangon a·bachengataha,’’ ua talataha.
“Ian election-nasan dakenga ong·ode gualani ong·a aro iako gamgiparangna nangani giminsa dakenga,’’FOCUS aro FOCUS+ programme-na gong kror 1500 tangkako sorkari on·aha, ua agandapaha.
“Maikai tangka-paisako jakkalenga ia agangiparang ma·sichakgijagiparang ong·a. FOCUS aro FOCUS+ scheme-na tangka-paisa on·ata gimik gong kror 450 batangpilaha,” Sangma aganaha.
Batbegipa 4.5 nokdangrangna tikkatna uamang jotton ka·engon gong kror 450-ko jakkalgen, ua aganaha.
Uamang report-rangko aro lekkarangko on·a nangaonin uamang gimikna tikkatna uamang nanggen aro kamrang bang·en donga, ua aganaha.
“Jensalo chinga batbegipa 4.5 nokdangrangna tikkatna nangaha indake gong kror 450-mang ong·skagen,” Chief Minister aganaha.
A·dokni kajioni ba loan ra·eba ong·chong uamang dingtang dingtang cholrangchi tangka-paisako man·enga uchi sorkariko rikenga. A·dok sorkari ia programme-ko bilsio ra·gatna miksongaha, ua aganaha.
“Bilsina chinga gong kror 450-ko on·a chanchia donga aro ian 4.5 lak nokdangna namgni ong·gen,” Sangma aganaha.
FOCUS aro FOCUS+ programme-ni ning·o gamgiparang tangka-paisani gita dakchakenggipa loan ra·a ong·ja, ua talatenba songsalo kangal-cholgrirangna uamangni janggi tanganiko tang·doatna miksonge tangka-paisani gita dakchakmanchaenga ine ua aganaha.
Batanggimin bilsisa atao ua programme-ko a·bachengatachi 25000 dolrang dongaha, Chief Minister u·iatapaha.