TURA: A·chik Literature Societyni Annual General Conferenceko 10th December, 2022-o Mason Phillips Academy, Turao ong·atao scholarrang, chatro-chatrirang, A·chik segipa jotgiparang aro NGOrang bak ra·angaha. Tom·aniko oprakani somoio, Vice-President Smt. Giribala G. Momin dilaha aro Rev. Dr. Alpha Senghba D. Marakchi Isolo bi·e a·bachengaha. President Prof. Caroline R. Marak aro Secretary Dr. Crystal Cornelious D. Marak batanggimin bilsirango covid sabisina lockdown ong·aoni da·ona A·chik Literature Societyni kamrang jedake- seminarrang, writers’ workshops, writers’ meet, chapa ka·anirang, Garo ku·sikko Eight Schedule Indiani Constitutiono napatna dabiani aro re·baenggipa January aro February, 2023-o National Seminar, International Mother Language Day seminar, Traditional Musical Instrument Workshop aro gipin kamrangko ka·na miksonganiko parakaha.
A·chik Literature Society Garo Hillso donggipa pilak skia-poraniko on·enggipa institutionrango a·bachenggipa gadangoni chubatgipa gadang universityo ong·enggipa kamrang, neng·nikanirang aro uarangko namatna nanganirangni gimin aganaha. President uni agananio da·ororo regional scholarrang, Bodo-Garo ku·sikko agangipa jatrangko apsan ku·mongate proto-Bodo-Garo ku·sikko ong·ate saksa sakgipin baksa agangrikna man·na kam ka·enga ine aganaha.
Mongsonggipa sokgipa Prof. Milton S. Sangmani agananio, A·chik Literature Society uamang kamrangko niksengbate ka·angchina aro seanio bananrangko tik ong·e donna kam ka·angchina didiaha. A·chik Literature Society aro gipin NGOrang, name segimin ki·taprang aro tik ong·gipa spellingrangko jakkale segipa ki·taprangkosa textbook dake on·china authorityrangna u·iatna nanga ine aganaha. A·chik jat an·tangni dakbewal-rikbewal aro ma·ambiko sena nanga ine ua didiaha. Ku·sik gipinrango donggipa agananirang, aganme·aparang aro uandakgiparangko A·chikkuona pe·e seanichi gipin jatni u·i-ma·sianiko aro gisik gnange agananirangko ku·tangoba u·iatna man·gen ine ua aganaha.
Conferenceona okamako man·e re·bagiparangoni Mr. Merild N. Sangma, Secretary, Garo Graduates’ Union, uni agananio chadamberangko songsaro ka·sae dangdike on·na didianiko on·aha. A·chikkuchi seanirangko bang·batatna nanganiko aro segimin ki·taprangko manderang poraina gisik nangbatachisa songsarko chu·bata gadangona ra·dona man·gen ine ua aganaha. Research scholarrang an·tangtangni sandie man·giminrangko Governmentna u·iatna nanga, jedakode policyrangko, programmerangko aro mikkangchina tarisamsoanirango uarangko jakkalna man·gen. Poraianirangko nirokgiparang, poraiani ki·taprangko chasongni kri gital syllabusrangko nipilna aro namatna nangenga. Bang·bata school aro collegerangko kulidapna nanganikoba ua aganaha.
A·chik Literature Societyni Literary Award 2021-ko Rev. Dr. Wetterfield R. Marakna uni A·chik sea-jotaniko ra·dona aro bang·batatna kam ka·anina on·aha. ALSni jatni doka damani workshoprangko 2010 bilsioni ong·ataoni bilsianti dakchakaniko on·ahanina, A·chik Literature Society, – Awardrangko A·chik Folk Music-na Rombagreoni Pa Dewal M. Sangma, aro Selbalgreoni Pa Ringjeng T. Sangmana on·aha.
Department of Garo, NEHU Tura Campusni chatro-chatrirang “Nokpante” ine katta bichongko done tagimin gitko guitar aro A·chik damako doke knatoe ring·aha. ALSni Vice-President Pa Basan R. Marak aro Ma Giting J. Sangma a·songna ring·mitelani git Hamilton Mominni tarigiminko ring·aha.
Sak chidok A·chik research scholarrang jemangan uamangni degreeko 2021- 2022 bilsio man·aha, uamanga- Rev. Dr. Chakme Ch. Marak, Rev. Dr. Alpha Senghba D. Marak, Dr. Tengchira T. Sangma, Dr. Natasha R. Marak, Fr. Dr. Jogesh B. Sangma, Dr. Brenda D. Marak, Dr. Jamie Mary Ch. Marak, Dr. Bilnang K. Sangma, Dr. Bellvydha S. Momin, Dr. Cassie Neelam M. Momin, Dr. Sengnat Agitchak Marak, Dr. Jobillyne D. Shira, Dr. Rhinkle M. Marak, Dr. Colnat B. Marak, Dr. Rita Marak, aro Dr. Gipson Marak, uamangna Annual General Conferenceo mandera·aniko on·e, certificaterangko Prof. Milton S. Sangmani jakchi on·aha. Mongsonggipa sokgipani jakchin ALSni kinggni ki·taprang Ku·basal (Garo-English Dictionary), aro Chasong Gitalo Sandie Seanirang jean 2020 bilsio ALSni seminarko ong·atgipao poraigipa paperrangko ka·dime ki·tap tarigipako oprake on·aha.
Business sessiono A·chik a·songo Pre-Primary gadang jean skia-porani ja·ting ong·a uno neng·nikanirang aro namatna man·anirangko agangrikaha. Da·ororo chatro-chatrirangna CUET seani bidingo skie on·na nangani giminba agangrikaha.
