TURA: Re·anggipa December-ni 14 tariko Garoland State Movement Committee (GSMC)-ni membor-rang, dingtang a·dokko dabienggipa NFNS aro gipin dolrang baksa, New Delhi-ni Jantar Mantar-o jinma tom·dakenba, Garoland a·dokna dabiangaha.
Ia NFNS dolara, a·songni dingtang dingtang biaprango dingtang a·dokrang, jekai Bundenkher, Garoland, Khasi-Jaintia State, Tipraland, Kukiland, Karbiland, Gorkhaland aro uandakgipa a·dokrangko dabidilenggipa dol ong·a aro ia salo GSMC-ni membor-rangba NFNS baksa bakrime, dingtang a·dokna dabianio bakko ra·angtokaha.
Ia tom·aniko NFNS-ni president Dr Munish Tamang aro vice president Nikman Ch Marak dilangaha aro dingtang dingtang a·dokrangko dabienggipani bidingo jinmana agan-talate on·angaha.
Garoland a·dokna dabiani bidingo GSMC-ni chairman aro NFNS-ni vice president Nikman Ch Marak, jinmana talate on·angengon, India a·songni jakgitelaniko man·na skang 1875 bilsion A·chik pagitcham Sonaram R Sangma sagini dilanichi Garoland a·dokna dabichengaha aro uni ja·man 1947 bilsini June 22 tariko A·chik pagitchamrang Garo National Council (GNC)-ni bimingo, Garoland a·dokna dabiani bidingo ma·mong sorkarina memorandum-ko on·chengahachim ine parakataha.
Marak-ni parakatani gitade, uni ja·man 1998, 1999 aro 2000 bilsirango Garo Students Union (GSU)-ni gitaba Garoland a·dokna dabiani bidingo a·songni Prime Minister-na memorandum-ko on·aha aro 2006 bilsio gitcham bobil dake chakatgipa A·chik National Volunteers Council (ANVC) dolba memorandum-ko on·ahachim.
“2011 bilsio HSPDP aro GNC dolrang, Meghalaya a·dokko bakenba, Khasi-Jaintia State aro Garoland a·dokna dabie dingtang memorandum-ko on·taiahachim aro adita salrangna skangsan Garo Hills Autonomous District Council (GHADC)-ba Garoland a·dokna dabie dingtangmancha resolution-ko pass ka·ahachim indiba da·alonan ia dabiani chu·sokgipa ong·na man·kujaenga,” ine GSMC-ni chairman parakataha.
