SHILLONG: Atomic Energy Department-ni tangka paisarangko dakchake on·anichi Shillong Civil Hospital-o rikgipa Cancer wing-ko Bristibar salo, a·dokni Health Minister James PK Sangma, nokdonggae on·angaha aro apsan somoion Meghalaya Mission Cancer Prevention & Early Detection-koba a·bachengate on·angjolaha.
Ia Cancer wing-ko nokdonggae on·angani somoio a·dokni Health Minister, jinmana aganprakatengon, cancer sabisiara bang·a manderangna siani raiko on·ani gita ong·e bang·a manderangnan dukni ra·bagipa ong·a ine parakatenba, ia kenbegnigipa sabisiko warachakna gita dingtangmancha simsak nirokaniko nanga aro iana science-ni gita bang·en am·sandianirangko dakengaha ine aganangaha.
Cancer sabisiko sanna bananisan ong·aigija chel·chakna gitaba kamrangko ka·na nangenga ineba Sangma aganaha.
A·songni skanggipa Cancer Care project-na Meghalaya a·doko a·dok sorkari aro Apollo group, MoU-o soi ka·grikaha ine janapatengon, ia Cancer Care project-ara Civil Hospital-ni Cancer wing baksa ia sabisiko chel·chakna apsan kamko ka·anggen ine Health Minister parakataha.
Meghalaya a·dokni pilak biaprangon bakan Cancer registry-ko kulignok ineba ia tom·anio Sangma parakataha.
Atomic Energy Department-ni tangka paisarangko dakchake on·anichi rikgipa ia Cancer wing project-ko 2008 bilsio ra·gatchengahachim aro iana pangchakaniko 2011 bilsini March 7 tariko a·dokni gitcham Chief Minister Mukul Sangma songe on·angahachim.
Ia Cancer wing-ko nokdonggae on·anganio dongpae jinmana aganprakanggipa gipin manderangara, National Health Mission (NHM) Meghalaya-ni Mission Director Ramkumar S, Health department-ni Principal Secretary Sampath Kumar aro gipinrang ong·a.
Shillong Civil Hospital-ni Cancer wing-ko Health Minister nokdonggae on·a
Date:
Share post:
