SHILLONG: BJP-ni Shillong District unit mijalo dingtangmancha mega bike rally-ko ong·atangaha, jeon bol 600 bapile bike, scooty-rang bak ra·angaha. Uamangni rally-ko Fire Brigade Madan Iewrynghep-oni a·bachenge songjinmako nape uamangni State Party Office, Bivar road-o matchotateaha. Uamangni rally-ko, State President, Ernest Mawrie aro Minister, Sanbor Shullai mang a·bachengate on·aha.
Indake Ma·mongo Narendra Modini sasonni ning·o Meghalayaona watatgipa scheme-rangni kam namani gimin kusi ong·e ia rally-ko ong·ataha ine BJP a·dok president Ernest Mawrie aganaha. Ua indakeba aganaha je Ma·mong sorkarini kamrangko party manderangna parakatgen, aro ma·mong gitan a·doknaba BJP namroro-silroroaniko ra·bagen Mawrie aganaha. Rally-o Sanbor Shullai minister-ba bakko ra·angaha.
Unomitingo, songjinma gimiko party flag-ko chue balatani gimin karyakarta-rangko party MLA AL Hek mittelangaha. Ua indakeba aganaha je party-ni bil, a·dokni kona noksikrangonan gipangengaha aro mikkang election-rangode BJP sorkarikon manderang basegen.
Re·baenggipa election-o manderangko namroro-silroroaniko baseatna gita miksonge BJP, ia ‘Rally For Development’ ko ong·ataha. Bang·a politician-rangan bilsi bongaprako ong·katenba tol·e tole manderangna ku·rachakaniko on·enba manderangko cha·bokenga ine aganan baksa indakarangni gimin manderangna mikrakataniko on·na gita ia ‘Rally for Development’-ko ong·ataha ine BJP aganaha.
