SHILLONG: VPP-ni gitcham organising secretary Rocky Marakko man·chape, sak 2000 mang ong·nasipile Nokma-rang, Songni sardar-rang, skigiparang, NPP-ni grass root memborrang, NPP-na chakgiparang aro chadambe dilgiparang mijalo North Garo Hills-ni Resubelparao mingsa program ong·atani somoio BJP-o bakrimetokaha ine koborona parakataha. Ia sak 2000 mang ong·nasipilgipa memborrangni BJP-o bakrimeani somoio, Assam-ni BJP Media Convenor – Rupam Goswami, National Council Member – Rikman Momin, ex-NPP MLA – Benedic R. Marak, MDC aro State Vice President – Bernard Marak, ex-CEM – Dipul Marak, MDC – Dharmonath Sangma, aro District President-rang aro gipinrang dongtokaha.
Unomitingo, mikkang changode Meghalayao BJP-onin chief minister ong·gen ineba Assam BJP-ni ku·wattimgipa Rupam Goswami aganaha.
BJP-ona re·bagipa manderang gimikko rimchaksoani kattako Goswami aganaha aro mikkang election-ni ja·mano sorkariko rikani ja·mano uamangni namgnina BJP kamrangko ka·chakkatgen ineba ua ka·dongate aganaha.
Namroro-silroroaniko baseani gimin ua manderangko mittelaha aro manderangna indakeba ku·rachakaniko on·aha je BJP-chi sason ka·enggipa a·dokrango jedake namroro-silroroaniko nikna man·achim, uandaken Garo Hills-ni manderangba ru·utgijan iandakgipa namroro-silroroaniko nikna man·gen ineba Goswami aganaha.
Election-ni ja·mande Prime Minister Narendra Modi, Meghalaya-naba chu·gimik namroro-silroroaniko ta·rakgen ra·bagen ine Rikman aganaha. Unomitingo, mikkang chango BJP sorkariko rikgenba a·doko pilak rusi-cha·bokanirangko bon·atgen aro pilak man·na nanganirangko manderangona sokatgen ine Bernard Marak aganaha.
Manderangni party-ona napbaaniara, dingtanganiko nikna gita BJP aro PM Narendra Modi-o manderangni ka·dongchakna man·aniko mesokaha ine Marak aganaha.
