Sorkari, pilaknan dormaharangko Krismas boksis dake on·na nanga: BJP

SHILLONG: Chief Minister Conrad Sangma, on·na nanga dormaharangko Krismasni boksis dake on·na nanga ine BJP aganaha. Chief Minister, da·omitingo an·senganirangko ong·atanio bang·en tangka paisarangko koros ka·miting somoio bang·bata kam ka·giparangan uamangni man·gni dormarangko man·gija dongskaenga, indakmiting somoio Council employee-rang, SSA-o skigiparang, Adhoc aro contractual-o kam ka·giparang, COVID staff-rang aro bang·arangan adita ja-ni dormarangko man·gija dongkuenga ine BJP aganaha.
Chief Minister, Krismasni asolgipa gamchataniko ma·sichakgenchimode, darangba Krismasni somoio duk ong·e dongna nangjawachim. A·doko jemangan dormahako man·gija dongengachim CM, uamangni man·gniko on·ani gimin daito ra·na nanga.  Krismas ong·na gita da·o antisa mangmangsan dongaiaha, unomiting somoio bang·a nokdangrangan dormaharangko man·jae neng·nikani aro jajrenganirangko man·enga, maina CM, indakgipa manderangna on·ani bidingo mamingkoba chanchikujaenga, BJP aganaha. CM an·tangni kamko chu·sokatna man·jagenchimoba Krismasni somoio, jean kusini sal ong·achaim, ia kusi katchaani salara, dormaha man·gija senge dongpaenggipa manderangni nokdangrangnade duknisa ong·skaenga. Uni gimin Chief Minister an·tangan finance department-ko jako ra·engani gimin iarangna an·tangan daito ra·e kamrangko ka·na nanga ine BJP aganaha.
Ma·mong, gimik on·na nanganirangko on·tokaha, indiba ma·mongni ning·o contractual employee-rang dormaharangko man·tokkujaenga. Mitam on·na nangarang dongkugenchimode aro uni giminba chinga maiaba cholchi dakchakna man·genchimode chinga uko dakgen. BJP, jedakgipa manianirangoba dakchakna sikgipa ong·a. Antyodaya-na chingni miksongani ong·a aro BJP, ia songsalo man·na nangnirang donggenchimode chinga uamangna dakchakaniko on·gen, aro Krismasni somoio chinga nambatako on·na ska, cha·e ringe aro an·senge kusi ong·anisan ong·ja, indiba una agreba kusi aro ka·saaniko on·ani ong·a. Niatgenchimode PMAY, PM Kishan, IHHL, Job card donggiparang, pension cha·gipa bu·chuma budeparang, pension cha·gipa segrirang, be·enni gita bilgriani gnanggiparang aro gipin man·na nanggnigiparangni man·gnirangko da·onaba on·gijaniara ra·chaktoani ong·ja. Krismasni somoio uamangni man·gniko on·janiara politics aro politician-rangko namgija bimingko man·ata, BJP aganaha.
Indake NPP-ni dilenggipa MDA sorkarini kakketgija kam ka·anirangko BJP nie dongchajawa, maina uan chingni  bebera·ani “Sabka Saath, Sabka Vikas, Sabka Vishwas, Sabka Prayas” baksa namen dingtanggrikani ong·a. CM, ma·mongni pilak dakchakanikon man·enga, indakmiting somoio uamang Krismasni somoio darangni nokdangona dukni sokbajachina kam ka·na nanga ineba BJP raken aganaha.