SHILLONG: Re·baenggipa 2023 bilsini Assembly election-o a·dokni Chief Minister Conrad K Sangma-ni amako man·aniara NPP-chi dilenggipa MDA sorkarini tangka jakkalsretanina aro sorkariko name chalaijani gimin manderangni suk ong·nikgijaniko mesokanian ong·gen ine Robibar salo, BJP-ni state vice president Bernard N Marak parakataha.
“Da·o ong·enggipa sorkarini kamrangna Garo Hills-ni manderang suk ong·tokjaengahani gimin chinga South Tura seat-ko chetelna ka·dongenga,” ine Marak, kobor ra·timgiparangna parakataha.
Marak-ni parakatani gitade, una kacharini jaminko on·aniara da·o uko bilakbatatani gita ong·aha maina ian uni kosako CM-ni matnanganirangko sakki gri matnangani ine mesokani ong·aha.
“Angni case-ko jako ra·anio simsakbee kamko ka·ahani gimin anga kachariko mittelpilna ska. Ian kakketko cheani ine mesokaniba ong·aha. Anga saksa politics-ni gita kal·akako man·gipa mande ong·a,” ine BJP-ni state vice president parakataha.
Chief minister-ko constituency damgnio susaenga ine jangbingbangenggipani gimin sing·on, ua jeoniba susana jakgitel ong·aia ine Marak parakataha.
“Manderang tangka jakkalsretaniko namniktokjani gimin ua (CM) amako man·telgen,” ine ua aganaha.
2018 bilsini Assembly election-ode BJP dol, Garo Hills-o seat damsakoba cherikna man·jaha ine janapatengon, ia chang election-ode BJP dolan NPP-na bate seat-rangko chegen ine Marak parakataha.
Marak-ni parakatani gitade, Prime Minister Narendra Modi-ni a·dokona re·baaniara a·dokni BJP dolna da·o election-na skang bang·en namgni ong·gnok.