SHILLONG: Re·baenggipa 2023 bilsini Assembly election-na skang Nationalist Congress Party (NCP), joltangni political dolrang baksa bakrime kamrangko ka·na miksongenga aro iani bidingo NCP-ni dilgiparang, People’s Democratic Front (PDF) baksa agangrikna a·bachengataha.
NCP-ni national general secretary Narendra B Verma-ni parakatani gitade, da·o ong·enggipa sorkarina ka·dongchakanirang komiengahani gimin re·baenggipa Assembly election-ode vote-rang pripranaba dongaha.
“Vote-rang priprae bon·aniko chinga niksamsoengani gimin joltangni political dolrang baksa election-na skang bakrime kamko ka·na miksongenga. Khasi Hills-o PDF-ni sakbri MLA-rang dongani gimin chinga PDF baksa agangrikna a·bachengaha aro angni re·angpilna skangba chinga changsataie uamang baksa agangriktaigen,” ine Verma parakataha.
Meghalaya a·doko da·o sorkariko chalaienggipa dolrango ka·dongchakna man·jaengani gimin, Congress dolba bon·angengahani gimin aro TMC-ba gital dolsa ong·kuengani gimin NCP-an Meghalaya a·doko songdongenggipa manderangna nambatgipa chol ong·enga ineba ua parakataha.
Garo Hills-ara NCP-ni bilakgipa biap ong·a aro NCP-ni state president Saleng A Sangma-ni biaptang ong·a ineba NCP-ni national general secretary parakataha.
Election-na skang NCP dol, Khasi aro Jaintia Hills jolni political dolrang baksa bakrimna miksongenga ine janapatengon, election-o vote-rang priprae bon·genchimode NCP aro NCP baksa bakrimgipa dolrangan sorkariko rikanio mongsonggipa kamko ka·skana man·gen ine Verma parakataha.
Ia chang Assembly election-o NCP, man·a dipet bang·bata constituency-rangon susana jotton ka·gen ineba Verma parakataha.