SHILLONG: Batanggimin bilsirango Meghalaya a·dokni Bharatiya Janata Party (BJP)-ni ning·o bang·en meligrikgijanirangko nikna man·ahaoba da·o 2023 bilsini Assembly election-na skangde apsan meli-nangrime kamrangko ka·na a·bachengtokskaaha.
Bilsi bongani gisepo a·dokni BJP dol ning·o bang·en meligrikgijanirangko aro saksa sakgipinni kosako matnanggrikanirangko nikna man·genchimoba da·o ia chang election-ode party-tangko cheatna gita pilak membor-rangan ku·cholsan ong·e kamrangko ka·skaengaha.
Kobor on·timgiparangni u·iatani gitade, batanggimin bilsirango BJP-ni state president Ernest Mawrie-ni kamo kusi ong·tokjae bang·a membor-rangan meligriktokjahaoba da·o BJP-ni MLA-rangsan ong·aigija, party-na kamko ka·enggipa aro membor pilakan nangrime kamrangko ka·skaengaha.
A·bachengode Meghalaya a·doko BJP-ni bang·bata membor-rangan state president Ernest Mawrie-ko ra·galchina dabitokahachim indiba da·o BJP-ni membor-rang pilakan, an·tangtangni gisepo meligrikgijanirangko bon·ate, doltangko cheatna gita ku·cholsan nangrime kam ka·na a·bachengtokengaha ine kobor on·timgiparang parakataha.
Batanggimin sal somoirango dingtang dingtang dolni MLA-rangba BJP-o napangtokahani gimin ia chang election-o chena gita BJP dol, dingtang dake ja·kurangko de·skaengaha indiba ia election-o BJP, badita seat-rangko chegen uasa sing·anide ong·skaenga.
BJP-ni state president Ernest Mawrie an·tangba ia election-o West Shillong constituency-oni susaengani gimin ia chang election-o West Shillong constituency-oni NPP, UDP aro BJP dolni gisepo susagrikaniko nikangna man·gen. West Shillong constituency-o NPP-ni Mohendro Rapsang aro UDP-ni Paul Lyngdoh, BJP-ni state president Ernest Mawrie baksa susagrikna siengachim.