SHILLONG: Budbar salo, West Garo Hills a·jani Batabari jolrango game ge·e cha·enggipa sak 2,822 manderangna FOCUS aro FOCUS+ program-ni gimik gong kror 1.41 tangkarangko a·dokni Chief Minister Conrad K Sangma-ni jakchi suale on·angaha.
Farmers’ Collectivization for Upscaling Production and Marketing System (FOCUS) aro FOCUS+ program-rangara, game ge·e cha·enggipa manderangko producer group dakatenba, uamangni gama ge·ani kamrangko tang·doatna gita sorkarini ra·gatgipa program ong·achim ine nikna man·a.’
Indake ong·engon, ia apsan salon Batabari jolo donggipa dol 14 self help group (SHG)-rangnaba gimik gong lak 39 tangkarangko Chief Minister suale on·angaha.
Iana agreba, jila kaanirangko dake cha·enggipa manderangko dakchakna sorkarini ra·gatgipa Rural Backyard Piggery Scheme ba PROGRESS scheme-ni ning·oba sak 300 manderangna, mang 1200 wak bi·sarangko aro sak 100 manderangna Kuroiler do·orangko suale on·angaha.
Ia scheme-ni namgnirangko suale on·na gita tom·aniko ong·atanio a·dokni Chief Minister, jinmana aganprakangengon, a·doko game ge·e cha·enggipa, bading chiwale cha·enggipa aro jilla kaanirangko dake cha·enggipa manderangni janggi tanganiko dingtangatna gita sorkari kamko ka·enga aro ia salo dingtang dingtang producer group-rangna, SHG-rangna aro dingtang dingtang kamrangko ka·e cha·enggipa manderangna sorkarini ra·gatgipa scheme-ni namgnirangko suale on·na man·ahani gimin kusi ong·a ine parakataha.
“Chingni dakna miksonganide uamangna pangkamgipa janggi cholrangko bang·bate on·e uamangni man·gnirangko changgni batatanian ong·enga. Batanggimin bilsi bri atao, chinga bang·a program-rangon namgipa biterangko ra·baanichi chegipa ong·aha,” ine Chief Minister aganaha.
