SHILLONG: Sorkarini dingtang dingtang kamrangko nambate ka·na man·na gita Bristibar salo, Meghalaya Geographic Information System (GIS) aro UAV Centre-ko a·dokni Chief Minister Conrad K Sangma kulie on·angaha.
Ia Meghalaya GUS aro UAV Centre-ko kulie on·anganio a·dokni Chief Minister aganprakatengon, Drone Technology-ara biaprangko wa·reng salanio ma·mong sorkariko dakchakanisan ong·aigija, sanna bananirango jakkalgipa ma·manti bosturangko ra·rurana, kosak gita mi misirangna samrangko satna aro uandakgipa kamrango bang·en dakchakanirangko on·enga ine parakataha.
“UAV ba drone-rangko jakkale data-rangko chimonganichi, dingtang dingtang department-rang, scheme-ni kamrangko nambate nirokna, gari gorarangni re·ruraanirangko nambate nirokna aro uandakgipa dingtang dingtang kamrangko nambate ka·na man·gnok,” ine Chief Minister aganaha.
Ia GIS aro UAV centre-ko a·bachengatanichi namroro silroroaniko ra·baani kamrango dingtanganiko ra·bana dakchakani ong·gen ineba Chief Minister parakataha.
