SHILLONG: Meghalaya a·dokna Congress dolni state election committee (SEC)-ko ra·chakmanaha aro ia committee, re·baenggipa December-ni 29 tariko tom·e chanchirimenba, re·baenggipa 2023 bilsini Assembly election-na sak 14-mangni gita candidate-rangko tik ka·anggnok ine Sukrobar salo, Meghalaya Pradesh Congress Committee (MPCC)-ni president Vincent Pala parakataha.
Re·anggipa bilsio Congress dolni bang·bata dilgiparangan ong·katgrime gipin dolrango napangahani a·sel da·o Meghalaya a·doko bilgriatako man·ahani gimin ia chang election-ode chadamberangko aro gital candidate-rangko susaatskana miksongengachim ine nikna man·a.
Iani bidingo kobor ra·timgipa manderang baksa agangrikengon, Meghalaya a·dokna SEC baksana campaigning committee, manifesto committee aro research & training committee-rangkoba ra·chakmanaha ine MPCC-ni president parakataha.
2023 bilsini Assembly election-na Congress dolni candidate-rangko state election committee ra·chakmanahaon candidate-ni bimingrangko jinmana parakatgen ineba Pala aganaha.
Dingtang dingtang dolrang Congress dolni dilgiparangko rime katengani gimin aro election-na da·o baditaba antirangsan dongaiahani gimin Congress dol, election-na bilakbate kamrangko ka·chakatgnok ineba Pala parakataha.
Pala-ni parakatani gitade, ia chang election-o sak 16 gitcham MLA aro MDC-rangba susana sienga aro pangna ong·rongbewal gitan ia election-oba da·o ong·enggipa MLA-rangoni 55 percent-de amako man·rikna sienga.
Ia chang election-o IT professional-rang, engineer-rang aro MBA graduate ong·gipa manderangba Congress doloni susana sienga ine kobor on·aha.
Re·baenggipa 2023 bilsini Assembly election-na skang Meghalaya a·doko dingtang dingtang political dolni MLA-rang, dolsaoni dolsaona katpripratokengahaon, Congress dolde da·o ong·enggipa MLA-rangko nangja aro gital candidate-rangkosa susaatna sienga ine adita salrangna skangsan MPCC-ni president Vincent Pala parakatahachim.
Ia chang Assembly election-o Congress dol 50 percent-kode gital candidate-rangna aro 50 percent-kode Ronnie, V Lyngdoh, PN Syiem, Deborah Marak, MDC-rang aro uandakgipa dilgiparangna on·skagen ine Meghalaya Pradesh Congress Committee (MPCC)-ni president Vincent Pala parakatahachim.