SHILLONG: FOCUS aro FOCUS plus program-rangko sorkario bak ong·enggipa dilgiparang, an·tangtangni man·gnina jakkalsretenga ine dingtang dingtang dolrangni matnanganiko a·dokni Chief Minister aro NPP-ni national president Conrad K Sangma jegalatenba, niamko ja·rikgenchimode je mandeba ia scheme-ni namgnirangko ra·na man·aia ine talataniko on·angaha.
“FOCUS aro FOCUS+ program-rangko 2021 bilsion a·bachengataha aro ian gital scheme ong·ja. Ia scheme-ko ra·gataoni bilsigni ong·aha aro bang·a manderangan iani namgnirangko man·engaha. Ia scheme-ni bidingo saoba politics-ni gita maikoba aganenga ong·ode uan ua mandeni chanchianisan ong·aia aro anga iani bidingo mamingkoba aganna nangani dongja,” ine Sangma aganaha.
FOCUS aro FOCUS+ program-ni ning·o gamna ge·na man·gijagipa biaprangoba mitam minister-rang aro MLA-rang, manderangna tangka paisarangko suale, ia scheme-ko jakkalsretaha National People’s Party (NPP)-chi dilenggipa Meghalaya Democratic Alliance (MDA) sorkario bak ong·paenggipa United Democratic Party (UDP), Chief Election Commissioner (CEC)-na badi ka·doangahachim.
Iani bidingo CEC-na badi ka·doangengon, ia scheme-ara songo noko game ge·e cha·enggipa manderangni namgnina ra·gatgipa scheme-sa ong·e game ge·e cha·na man·gijagipa biaprangode manderangna ia scheme-ni tangka paisarangko suale on·na man·ja ine UDP-ni dilgiparang, mikkangchi ia scheme-ko jakkalsretna man·jana gita ja·kurangko de·china CEC-ko didiatahachim.
Iandake matnanganirangna aganchakaniko on·angskaengon, “Manderang an·tangtangni ska gita matnange rona man·aia indiba chinga ia program-ko batanggimin bilsignina a·dokni dingtang dingtang biaprango ra·gate ka·engaha,” ine Chief Minister parakataha.
Ia scheme-ni namgnirangko ra·na gita adita niamrang donga ine janapatengon, ia niamrangko ja·rikgenchimode je mandeba ia scheme-ni namgnirangko ra·na man·aia ine Sangma parakataha.
