TURA: 2022 December 25-o International Boundary-ko batsote India-ni a·jao napgipa Bangladesh-ni pante saksako BSF Meghalaya songsul a·song Border Guard Bangladesh-na South Garo Hills International-o pakwatataha.
43 Bn-ni ning·ogipa BSF outpost Rongra-ni BSF Patrolling party, Bangladesh-ni panteko International Border sepango roramengako rim·rikaha. Pante International boundary-ni gimin maming simsakgija re·baaha aro engtogija obostao India-ni a·jao napaha.
Ua bilsokgijagipa pante bi·sa bilsi 15 ong·gipa Bangladesh, Netrakona district ning·ogipa Gora-gaon songoni Abdul Hamid-ni depante Sahid minggipa ong·a.
Border Guard Bangladesh, me·a bi·sako uamangna pakwatmitingo tom·ao BSF-ni namgipa kamrangna mittelaha indake mikkangchi meli-nangrimani gimin aganaha.