SHILLONG: Da·o NPP-chi dilenggipa MDA Sorkari Assam aro Delhi-o BJP-na bame on·aha ine Trinamool Congress (TMC) Meghalaya-o mijal Sombar salo aganaha.
Ru·utgija salo Prime Minister Narendra Modi-ni wenbao Chief Minister Conrad K Sangma-ni agangipa kattako janape, uni sorkari uni jumangrang gita ong·enga aro salgro-salaram a·jolna uni miksongani bidingo skanirang gita ong·enga ine Chief Minister-ni kattaoniko ma·sirikna man·enga ine TMC Meghalaya-ni kobor on·timgipa George B Lyngdoh aganaha.
“A·dok sorkarini bilgrianiko mesokani ong·a,” Lyngdoh aganaha.
Mukroh-o slai gogipa a·selni mamlarangni bidingo ja·rikna bil-sason ka·enggipa mamingon dakna amja jeni a·sel Meghalaya-oni sak bonga aro Assam-oni saksa sina gita nangaha, TMC Meghalaya kobor on·timgipa matnangaha.
Kobor ra·timgiparangna aganao Special Investigation Team (SIT)-ni Mukroh a·selko sandianiara niknamangmang mesokani gitasan ong·aia ine Meghalaya Trinamool Congress spokesperson, George B. Lyngdoh aganaha.
An·chingni a·jao FIR-ko segatna nanga aro jemangan dosi donga uamangko a·kangna aro rim·na lekka sokatna nanga ua aganaha.
CRPC-ni niamrang gita aro niam aro retini gita uko dakna nanga, ua aganaha.
“Indiba sorkari ua mamlarako SIT-ona ra·angaha jekon chinga gimikan indakgipa sandianiara unosan ong·aia ine ma·sia,” Meghalaya Trinamool Congress spokesperson aganaha.
CBI-chi sandiani bidingo ma·mongni ka·dongatani bidingo sing·ao uamango agenda dongaonin a·dok sorkarini official-rang aro Minister-rang Delhi-ona re·angaoni maming chu·sokani kamko nikja opposition aganmanaha, Lyngdoh janaptaiaha.
“Ia sorkarini agenda bang·pagijagipa jat manderangko namgija dakani ba nosto ka·nasa ong·aia indake Mukroh-o a·sel ong·angaha,” TMC Meghalaya spokesperson agandapaha.
