SHILLONG: Meghalaya Democratic Alliance (MDA) sorkario bak ong·paenggipa Hill State People’s Democratic Party (HSPDP)-ni MLA sakgnian da·o ong·na sienggipa Assembly election-na skang gipin dolrango napna miksongskaengaha ine kobor on·aha.
2018 bilsini Assembly election-o HSPDP-ni MLA sakgnimangmang cherikna gita man·ahachim aro uamangara, Mawkyrwat-ni MLA aro Cabinet minister ong·enggipa Renikton L Tongkhar baksana Sohiong-ni MLA Samlin Malngiang ong·achim.
Koborko on·ani gitade, Cabinet minister Renikton L Tongkhar, United Democratic Party (UDP)-o aro Sohiong-ni MLA Samlin Malngiang, National People’s Party (NPP)-o napna tariskaengaha.
Ia MLA sakgnini gipin dolrango napengani gimin janapatengon, “MLA-rangde re·bae re·angaigen indiba chingni party batanggimin bilsi 60-na dongaha. MLA-rangni napa, ong·kata dakaniara gital kam ong·ja,” ine HSPDP-ni general secretary Panbor Rynthathiang parakataha.
Ia MLA sakgniko HSPDP-ni dilgiparang ra·gale galenga ong·ja indiba uamang an·tangtangni skani gitasa ong·katangenga ineba Rynthathiang parakataha.
HSPDP aro UDP dolrang, regional democratic alliance (RDA)-o bakrime dongangkuaigen ineba HSPDP-ni general secretary parakataha.
Assembly election-na HSPDP-ni skanggipa candidate-rangko January 10 ba una skangan parakatgen ine talataniko on·angengon, ia election-o HSPDP, Mawkyrwat, Rambrai, Mawthadraishan, Mawhati, Umsning, Nongstoin aro gipin constituency-rangoba candidate-rangko susaatgen ine Rynthathiang parakataha.