SHILLONG: Meghalaya a·dokni nokdang ge·antio donggipa me·chik sakpraknan gong 1000/- tangkako on·na ku·rachake Trinamool Congress (TMC)-ni ra·gatgipa Meghalaya Financial Inclusion for Women Empowerment Scheme (MFI WE) ba ‘WE Card’ scheme-ni bidingo Meghalaya a·dokni BJP dol, Election Commission (EC)-na badi ka·doangaha.
Ia scheme-ara election-ni somoio manderangko salna miksonge ra·gatgipa scheme-sa ong·enga ine BJP-ni state president Ernest Mawrie matnangatenba, ia scheme-ni bidingo Election Commission-na badi ka·doangaha.
Mawrie-ni parakatani gitade, ia ‘WE Card’ scheme-ara West Bengal a·dokon chu·sokgipa ong·jahachim aro da·o TMC dol, Meghalaya a·dokni me·chikrangko ia scheme-chi cha·bokna jotton ka·skaengachim.
“TMC dolara West Bengal-ni party-sa ong·a indiba uamang an·tangtangko national party ine a·kangskaenga. Meghalaya a·doko uamang maming kamrang dongjani giminsa West Bengal a·doko chu·sokgijagipa ‘WE Card’ scheme-ko ra·baskaenga,” ine Mawrie parakataha.
Election-ni dongimin niamrangon, party-rangko ku·rachakanirangko dakjachina donmanahachim ineba BJP-ni state president parakataha.
‘WE Card’-ko re·anggipa December-ni 13 tariko, TMC-ni dilgipa aro West Bengal a·dokni Chief Minister Mamata Banerjee-ni Shillong-ona re·baanio a·bachengate on·angahachim.
Ia ‘WE Card’ scheme-ara a·dokni nokdang ge·antion me·chik sakprakna japrako gong 1000/- tangkako dakchake on·na TMC-ni ra·gatenggipa scheme ong·achim aro ia scheme-ni namgniko TMC, Meghalaya a·doko sorkariko rikna man·ahaon on·na ku·rachakengachim.