SHILLONG: Assam a·doko donggipa Kristian mondoli aro gilja nokrangko survey ka·china Assam sorkarini ge·etaniko on·ahani gimin All India Trinamool Congress (AITC)-ni national spokesperson Saket Gokhale, Vatican-ni Holy See-ni ning·o donggipa Embassy-na sedoataha.
Iani bidingo Vatican Holy See-ni Embassy, Apostolic Nuncio to India, Reverend Leopoldo Girelli-na sedoatengon, “Assam-o Kristianrangko dokkol ka·na a·dok sorkarini jotton ka·enganiara namen jajrengna nangani ong·engani gimin iani bidingo His Holiness Pontifex Maxims aro Holy See-na u·iatan baksana nangani kri India sorkari baksa agangrikatchina chinga nang·ko mol·molenga,” ine AITC-ni spokesperson Saket Gokhale parakataha.
Adita salrangna skang, Assam a·doko donggipa Kristian mondolirangni gimin aro Kristian toromo napatgipani gimin am·sandie Assam police-ni sedoatgipa chittini bidingo Gokhale, Vatican Holy See-ni Embassy-na sedoataha.
Assam a·doko Kristian dilgiparangkosan ong·aigija Gitel Jisu Kristoni skianirangko ra·e Kristian toromko ra·gipa manderangni kosako dokkol ka·na gita Assam sorkari, police aro intelligence department-ko jakkalenga ineba Gokhale, Vatican Holy See-ni Embassy-na sedoatgipa chittio janapataha.
“Indian Constitution-ni Article 25-ni ning·on an·tangtangni bebera·aniko skina, gipatna aro ja·rikna gita bilko on·manaha. A·gilsak gimikni niamo aro Geneva Convention-oba an·tangtangni bebera·gipa toromko jakgitele manina bilko on·manahachim,” ine AITC-ni national spokesperson parakataha.
Iandake ge·etaniko on·anichi BJP sorkari, Assam-o donggipa Kristianrangko dokkol ka·na aro manderangni jakgitele olakkianiko champengna jotton ka·enga ineba Gokhale parakataha.
