SHILLONG: Bangladesh a·songona watatna miksonge East Khasi Hills a·jani simaona pik-up truck gario ra·bagipa gong lak 11-mangni ba·ra kancharangko Budbar salo, BSF Meghalaya Frontier-ni ning·o donggipa 4th Battalion-ni sipairang rim·rikna man·aha ine kobor on·aha.
BSF-oni koborko on·atani gitade, ia ba·ra kancharangko Bangladesh a·songona palsrukatna gita East Khasi Hills a·jani simaona ra·baahachim.
Indake ong·engon, BSF-ni 43 Battalion sipairangba, Meghalaya Police baksa nangrime am·sandianirangko dakengmiting somoio, India a·songoniko Bangladesh a·songona niam gri ma·manti bosturangko ra·angna gita India a·songona niam gri re·bagipa Bangladesh a·songni mande saksako South Garo Hills a·jani simaoniko rim·na man·aha ine kobor on·aha.
Rim·a man·gipa mandeara Bangladesh a·songni Netrakona a·jao donggipa Bhawanipur songni bilsi 20 ong·gipa Md Asherul Hoque ong·achim aro BSF-ni sipairang uoniko, kombol, nonga sitani bosturang, chu aro uandakgipa ma·manti bosturangko man·aha ine u·iataha.
India aro Bangladesh a·songni simao iandake niam gri bading chiwalaniko champengna kam ka·anio BSF-ni sipairang, ia December jani gisepon gong lak 99-mangni ba·ra kancha aro nonga sitani bosturangko rim·na man·aha ineba kobor on·aha.
