SHILLONG: Batanggimin bilsisani gisepo Assam a·doko kuligipa Kristian gilja nokrangni gimin aro Kristian toromo napanggipani gimin Assam sorkarini am·sandichina ge·ete chitti seatahani gimin United Democratic Party (UDP)-ba suk ong·gijaniko parakataha.
“Kristian gilja nokrangni gimin Assam sorkarini am·sandichina ge·etaniara Kristianrangko kenjagokatna jotton ka·anisa ong·enga. Ia kamara ra·chakna man·gijasan ong·aija indiba a·songo dongimin niamrangko pe·aniba ong·enga,” ine Sukrobar salo UDP-ni working president, kobor ra·timgiparangna parakataha.
Assam a·doko Kristianrangni jelbra jelsuanirangko am·sandiana bate kamgri ong·ani aro kangal cha·a siani gita dakgipa gipin kamrangkon Assam sorkari namatchengna nanga ineba ua parakataha.
Assam a·doko donggipa Kristian mondoli aro gilja nokrangko survey ka·china Assam sorkarini ge·etaniko on·ahani gimin All India Trinamool Congress (AITC)-ba, Vatican-ni Holy See-ni ning·o donggipa Embassy-na sedoatahachim.
Iani bidingo Vatican Holy See-ni Embassy, Apostolic Nuncio to India, Reverend Leopoldo Girelli-na sedoatengon, “Assam-o Kristianrangko dokkol ka·na a·dok sorkarini jotton ka·enganiara namen jajrengna nangani ong·engani gimin iani bidingo His Holiness Pontifex Maxims aro Holy See-na u·iatan baksana nangani kri India sorkari baksa agangrikatchina chinga nang·ko mol·molenga,” ine AITC-ni national spokesperson Saket Gokhale parakatahachim.