SHILLONG: Meghalaya a·doko Chief Minister Conrad K Sangma-chi dilenggipa MDA sorkariko ong·gija kamrangna matnangtokengani gimin aro Meghalaya a·doko Congress dol da·o cholijaengahani gimin re·baenggipa February jao ong·atna sienggipa Meghalaya Assembly election-ni ja·man gital sorkariko Trinamool Congress (TMC) rikskagen ine Sukrobar salo, TMC-ni dilgipa aro Rajya Sabha MP Sushmita Dev a·kangataha.
Sushmita Dev-ni parakatani gitade, NPP-chi dilenggipa Meghalaya Democratic Alliance (MDA) sorkari, Meghalaya a·dokni manderangna maming kamrangkon ka·jahachim aro a·dokni mongsonggipa Opposition Congress dolba da·o bon·anga gita ong·engahachim.
“Meghalaya a·doko da·o TMC dolan mongsonggipa opposition dol ong·enga aro niksengbatgipa dolba ong·enga. Meghalaya a·dokni pilak biaprangon TMC dol da·o manderangni chakpaanirangko man·engaha aro manderang TMC-ko bilona re·baaniko nangniktokenga. Chingni ning·in ning·in am·sandie man·ani gitade, TMC-an Meghalaya-o gital sorkariko rikgen,” ine Dev parakataha.
Congress dolde Meghalaya a·doko maming kamrang dongsrangjaha ineba TMC-ni dilgipa a·kangataha.
2021 bilsio Meghalaya a·dokni gitcham chief minister Mukul Sangma baksana sak 11 MLA-rang Congress dolko wate TMC dolo napangani ja·man, a·doko TMC dolan mongsonggipa opposition dol ong·skaahachim ine nikna man·a.
“Meghalaya a·doko chingni pangchakani bilakaha aro February jao ong·atna sienggipa Assembly election-na skangde chinga bilakbatanggnok,” ine 2021 bilsini August jao Congress dolko wate TMC-o napanggipa Sushmita Dev parakataha.
