TURA: Sukrobar salo, A·chik Literature Society (ALS)-ni tom·aniko New Tura-o donggipa Mount Zion School-o ong·atangenba, 2021 bilsio A·chik Literature Society-ni Literary Award-ko man·gipa Tura Baptist Mondolini gitcham Pamong Rev Dr Wetterfield R Marak-na citation-ko on·e mande ra·pilskaaniko dakangaha.
Ia tom·aniko ong·atanio A·chik Literature Society-ni president Prof Caroline R Marak, jinmana aganprakengon, Rev Wetterfield R Marak-ni segipa ki·taprangni gimin janapangenba, Rev Marak-ni seanirango mondoliko dilgiparang aro membor-rangna skie on·ani, manderangni janggi tangani gimin seani, mingsinggipa biaprang, a·brirang, sam-bolrang, Rongtalgipa A·songni chibimarang aro da·o uni seenggipa ki·taprango dingtang dingtang katta bichongrango pangchake seaha ine parakangaha.
Ia tom·anio Literary Award-ko man·gipa Rev Wetterfield R Marak-ba tom·anio bak ra·giparangna aganprakangengon, uni seanirangko ua mondolio dilgiparang aro membor-rangna skie on·na aro napbolna sigiparangna skie on·na seanirangchi a·bachengbae, manderangni janggi tangani, Rongtalgipa A·songni songreange nikbagimin aro gipinrangni giminba ua sandie seaha ine parakataha. Uni da·o am·sandie seenggipa ‘A·chik Jatna Seng·a Nabaa’ ki·tapo missionary-rangni A·chik jatna kam ka·ani bidingo ua seenga aro ia ki·tapko ua mikkangchi A·chik Literature Society-ni jakchi oprakatna miksonganirang donga ineba Rev Marak parakataha.
Rev Marak-na A·chik Literature Society-ni segipa citation-ko ia tom·anio ALS-ni secretary Dr Crystal Cornelious D Marak-ni poraiatskaaha.
Ia tom·anio dongpae jinmana aganprakanggipa gipin manderangara, ALS-ni executive membor Dr Jacqueline R Marak aro ALS-ni joint secretary Dr Colnat B Marak ong·a.
