RESUBELPARA: Bilsianti dakrongbaenga gitan ia gital bilsioba January-ni 2 tariko, gital bilsiko rimchaksona aro Kristianrangni kusi ong·e manianiko matchotatna Songkritan chrokaniko North Garo Hills a·jani Bangsi Apal songo ong·atangtaiaha aro ia chrokanio Garo Hills-onisan ong·aigija Assam aro gipin jolrangoniba re·bae bakko ra·angtokaha.
Ia Songkritan chrokaniko 2005 bilsi dipetan January-ni 2 tariko, 2nd January Grand Celebration Songkritan Committee-ni gita Bangsi Apal songo ong·atrongenga aro bilsiantian ia chrokanio hajal kotok manderangni re·bae bak ra·aniko nikna man·rongenga.
Sombar saloba ia program-ko ong·ataniona dingtang dingtang biaprangoni sak 20,000-na baten manderang re·bae bakko ra·angtokaha aro ia chrokanio manderang, an·tangtangni dama aro ma·manti doka dam·ani bosturangko doke dam·e an·saoangtokaha.
Koborko on·ani gitade, Bangsi Apal songo ia chrokaniko pring 11:00 bajimangoni a·bachengate attam 5:00 bajimango matchotataha indiba dingtang dingtang biaprangoni manderang, ia biapona pring 8:00 bajimangonin sokbana gita a·bachengtokaha aro matchotani ja·manoba walonan manderangni re·ongkatangpilanirangko nikna man·aha.
“A·chik Kristianrangni dakbewal rikbewalko ripinge rakkina gita chinga ia Songkritan chrokaniko January-ni 2 tariko Bangsi Apal songo ong·atrongenga aro mikkangchiba ia chrokaniko ong·atangkuna miksongenga,” ine ia Songkritanko ong·atenggipa committee-ni dilgipa saksa Jaffrey Momin parakataha.
Skang somoirangode A·chik songrango, bi·sarangni porikka matchota bakan damarangko doke Songkritan chrokaniko a·bachengrongachim indiba da·ororode iandakgipa A·chikrangni dakbewal gimaangengahani gimin ia dakbewalko tange rakkiangkuna aro A·chik Kristianrangni Krismas aro Bilsi Gital manianiko matchotatna gita ia Songkritan chrokaniko January-ni 2 tariko Bangsi Apal songo ong·atrongenga ineba Momin parakataha.