TURA: Gital 2023 bilsiko ga·tapahaon, Tura jillaoba jabolrangko nambate chimonge galna man·na gita Tura Municipal Board (TMB), gital garirangko ra·baaha.
Official-rangni u·iatani gitade, ia jabol chimonggipa gital garirango, ran·gipa aro sosigipa jabolrangko chimongna dingtang dingtang biaprang donga aro dingtang dingtang gittimrangona jabolrangko chimongna re·ani somoio manderangna u·iatna gita ia garirango sound system-ba donga.
Tura Municipality-ni ning·o donggipa pilak gittimrangon, sosigipa aro ran·gipa jabolrangko noktangtangon ma·ekate galna ranta ka·china gita adita salrangna skangsan, West Garo Hills a·jani District Magistrate, Tura jillao songdongenggipa pilak manderangkon ge·etangahachim.
Iani bidingo Tura jillao songdongenggipa manderangna u·iataniko on·atengon, jabol chimongchakgipa biapo ia jabolrangko ma·ekattaienba, dingtang dingtang kamrangna jakkalna man·na gita jabol chimonggipa garirango, sosigipa jabolko dingtang aro ran·gipa jabolrangko dingtang dake chimongchina Tura Municipal Board-ni Chief Executive Officer-naba District Magistrate ge·etaniko on·angahachim.
District Magistrate-ni u·iatani gitade, Tura jillani dingtang dingtang biaprangoniko jabol chimongani da·o ta·raken gapangengaha aro uandaken ia jabolrangko dingtang dingtang kamrangna jakkalskana man·na gita sosigipa aro ran·gipa jabolrangko ma·ekate galna nangengahachim.
Soninggipa aro soninggijagipa jabolrangko name nirokna gita jabolrangko ma·ekate galna nangchongmota ine janapatengon, iandakgipa jabolrangko name galjagenchimode ian samtangtango saninggipa jo·ongrangko ong·atna ama ine District Magistrate parakataha.
