SHILLONG: India aro Bangladesh a·songni simao nirok sandina donako man·enggipa Border Security Force (BSF) dolni Sniffer ‘Lalcy’ achak mangsa, bi·sa manggittamko duani ja·man, iani bidingo sandirokaniko dakchina dal·batgiparangoni ge·etaniko on·ataha.
Official-rangni u·iatani gitade, ia sniffer achakrangko pangnan bang·e chel·chakna nanggipa biaprangosa kamko ka·atrongani gimin bi·sa duna ba an·o dongna gita on·rongjachim aro bi·sa duatgenchimoba iandakgipa achakrangko pangnan nirokani ba BSF-ni ning·o donggipa veterinary wing-ni ku·pattianio pangchakesa dakrongachim.
Indake ong·engon, Baghmara Border Outpost (BOP)-o BSF sipairangko dakchakenggipa ‘sniffer’ achak, re·anggipa December-ni 5 tariko bi·sa manggittamko duahani gimin ma·mongni BSF official-rang, iani bidingo sandirokaniko dakchina Tura Danakgre-o donggipa 170 Battalion-ni Deputy Commandant-na ge·etaniko on·ataha.
A·songko chel·chakanio Indian Army-ni gnigipa ong·e BSF dolba, dingtang dingtang gadango kamrangko ka·na gita pangnan achakrangko skie kamrangko ka·atrongachim ine nikna man·a.
Ia achakrangara sipai dolrangko, bobil dake chakatgipa dolrangko warachakaniosan ong·aigija pilak kamrangon dakchakanirangko on·engachim ineba nikna man·a.