SHILLONG: Meghalaya a·dok gita chongipa a·dokko ma·mong sorkarini bak dake on·aniko National People’s Party (NPP)-de nangnikjaenga ine NPP-ni spokesperson Ampareen Lyngdoh parakataha.
Meghalaya a·dokko Khasi-Jaintia aro Garoland dake bak dakchina dabienggipani bidingo Lyngdoh, ia kattarangko janapataha.
“Kashmir-o mai ong·aha an·ching pilakan nikna man·aha, uni gimin Meghalaya a·dokoba apsan dakgipa obostako chinga ong·atna nangnikjaenga,” ine Lyngdoh aganenba, Kashmir a·dokna ong·a obostaoniko skie ra·china a·dokni manderangko didiataha.
“An·ching dongimin arina batanggenchimode mamingchiba ong·srangjawa aro bon·kamaode union territory-onasa tang·onangsrangnaba gnang. A·dokko jakgitele chalaianiba dongsrangjawaha,” ine NPP-ni ku·wattimgipa aganaha.
Meghalaya a·dok da·o bilsi 50-san ong·engpiti aro a·dokko bak dakani gimin chanchinade bang·en somoirangko nangkugen ineba Lyngdoh parakataha.
A·doko songdongenggipa manderangni ku·cholsan on·kange krengani a·selsa Meghalaya a·dokko man·aha ine gisik ra·china gitaba ua dingtang dingtang dolrangko didiataha.
Meghalaya a·dokko maming an·chi pari nikani gri nama bewalo man·ahani gimin a·doktangko chel·chakna nangenga ineba ua aganaha.
Lyngdoh-ni parakatani gitade, 1970 bilsirango Assam a·doko songdongenggipa pilak manderangkon ku·sik mingsakosan jakkalatna miksonganirang dongani giminsa jegalanirangko dakna a·bachenge Meghalaya a·dokko man·ahachim.
Khasi aro Garo ku·sikrangko Constitution-ni Eighth Schedule-o napatchina gita skang somoirangonin dabiengahachim ineba NPP-ni dilgipa parakataha.
“An·chingni jelbra jelsuaniara namen komiani giminsa an·chingni dabianiko ma·mong sorkari nipilkuengakon,” ine ua aganaha.