SHILLONG: Nongkrem constituency-o a·dokni Transport Minister Dasakhiat Lamare, tangka paisarangko suala ine badi ka·gipa dolsa manderangko sing·sandina gita East Khasi Hills a·jani Deputy Commissioner Isawanda Laloo okamataha.
Kobor on·timgiparangni u·iatani gitade, Nongkrem constituency-o a·dokni Transport Minister Dasakhiat Lamare, manderangko salna gita kombolrangko sualaha ine adita salrangna skang badi ka·doangahani gimin badi ka·gipa dolni manderangko sing·sandina gita Deputy Commissioner okamataha.
Salantian Lamare-ni bolgittam bolbri truck garirang, Nongkrem constituency-ni dingtang dingtang biaprangona re·ange kombolrangko sualenga ine kobor on·timgiparang matnangatahachim.
Ia truck garirangko pringantian Madanriting-o donggipa Transport Minister-ni office-o donako nikrongenga ineba kobor on·timgiparang parakatahachim.
Matnangako man·enggipa Dasakhiat Lamare-ara da·o dipet Mawhati-ni MLA ong·engachim indiba ia chang Assembly election-o ua Nongkrem constituency-oni susaskana siengachim ine nikna man·a.
Nongkrem constituency-o a·dokni Cabinet Minister Dasakhiat Lamare, tangka paisarangko sualenga ine matnangtokengani gimin adita salrangna skangsan, Trinamool Congress (TMC)-ni dilgipa Saket Gokhale-ba inquiry-ko dake report-ko on·china dabiangahachim ine nikna man·a.
Da·o dipet a·doko election-na Model Code of Conduct (MCC)-ko ra·gatkujaengani gimin Lamare-ni kosako badi ka·aniko a·dokni Chief Electoral Officer (CEO) FR Kharkongor, East Khasi Hills a·jani Deputy Commissioner-na pakwatatskaenba, iani bidingo nanga gita ja·kurangko de·china u·iatskaahachim.
