TURA: Mongolbar salo, Meghalaya a·dokni Governor Brigadier (Dr) BD Mishra, West Garo Hills a·jaona re·baenba, dingtang dingtang department-ni kamrangko nipilna gita Tura-ni Circuit House-o tom·aniko ong·atangaha.
Ia tom·anio, a·dokni Governor, dingtang dingtang department-ni officer-rang baksa chanchirimangengon, bilsi gitalni namgipa skaniko on·angenba, officer sakantikon on·kange aro kakketo kamko ka·china didiangaha.
A·doko songdongenggipa manderangni namgnina kamrangko ka·china aro manderangni janggi tangani gadangko ra·dochina gitaba ua, pilak officer-rangkon didiangaha.
Power point presentation-o me·su-samjakrang, be·en bitinrang aro dingtang dingtang bosturang chu·ongjaenga ine parakatgipani gimin janapatengon, a·songni namroro silroroaniko nikna man·na gita bosturangni chu·onggijaniko namatna dingtang dingtang department-rang baksa bakrime kamko ka·china gita Brig Mishra, officer-rangko didiangaha.
Iani ja·mano ua dingtangmancha, Garo Hills Autonomous District Council (GHADC)-ni membor-rang baksaba tom·e chanchirimangaha, jeon ua MDC-rangko autonomous district council-ni nirokgiparang ine mittelpilangenba, an·tangtangni man·enggipa tangka paisarangko jolo namroro silroroaniko ra·bana chu·gimik jakkalchina aro somoi gita kamrangko matchotatchina didiangaha.
Ia tom·anio West Garo Hills a·jani Deputy Commissioner Swapnil Tembe, a·jani gita chu·sokatgipa kamrangni bidingo agan-talate on·angskaaha.
Ia tom·anio dongpae bakko ra·anggipa gipin manderangara, GHADC-ni Chief Executive Membor Albinush R Marak, GHADC-ni Executive Membor-rang, West Garo Hills a·jani Superintendent of Police (SP) VS Rathore, ADC-rang aro dingtang dingtang department-ni officer-rang ong·a.
Ia tom·anio bakko ra·ena skang a·dokni Governor, North Eastern Hill University (NEHU) Tura Campus-o kam ka·ani bewalrangko niangan baksana Tura-o rikenggipa Governor’s House-koba niangaha.
A·dokni Guv, West Garo Hills-ona re·bae dingtang dingtang dept-ni kamrangko nipilanga
Date:
Share post:
