SHILLONG: India a·songni dingtang dingtang biaprango Kristianrangko kragija dake chadrapengani gimin Bharatiya Janata Party (BJP)-ko matnangtokengon, salgro salaram a·dokrango aro mongsongbate Meghalaya a·doko BJP baksa bakrimenggipa dingtang dingtang jolni political dolrangkoba iani bidingo a·dokni Congress dol matnangataha.
Iani bidingo sing·anina aganchakaniko on·angengon, Meghalaya a·doko sorkariko dilenggipa National People’s Party (NPP)-de ma·mongo BJP-chi dilenggipa NDA sorkarini bak ong·paenga aro jolni political dolrangba North East Democratic Alliance (NEDA)-ni bak ong·paengani gimin a·songni dingtang dingtang biaprango Kristianrangni kosako ong·gija dakanio apsan daken jak dongpagiparang gita ong·enga ine Budbar salo, Congress dolni dilgipa Ronnie V Lyngdoh parakataha.
“A·songni dingtang dingtang biaprango Kristianrang aro chonchongipa jatrangni kosako ong·gija dakanio uamangba dai donggiparangan ong·gen. Bilsi bongana na·simang apsan meli-nangrime kamko ka·aha aro da·o na·simang iako jegalna man·jawa,” ine Lyngdoh parakataha.
BJP-chi sason ka·enggipa a·dokrango chonchongipa toromni manderang aro Tribal-rang, neng·nikanirangko chagrongna nangtokenga ine janapatengon, Meghalaya a·dokni manderangde tom·tomao janggi tangna namnikgiparangsa ong·ani gimin BJP-ko jegaltokgen ine Lyngdoh, an·tangni ka·dongchakenganiko parakataha.
Chattisgarh a·doko Kristianrangko chadrapanina an·tangni suk ong·gijaniko parakatengon, dos dakgipa manderangni kosako rakgipa ja·kurangko de·china Congress dol, ma·mong aro Chattisgarh sorkariko didiataha ine Lyngdoh parakataha.
Indake ong·engon, Congress dolni sakgipin dilgipa JA Lyngdoh-ba adita salrangna skang, Kristianrangni kosako sing·sandie Assam SP-ni sedoatgipa chittini bidingo janapatenba, Assam Chief Minister-na u·iatchengani gri maikai saksa SP, iandakgipa chittiko sedona man·aha ine sing·doataha aro una u·iatgija dakbebegenchimode nanga gita SP-ni kosako ja·kuko de·china Assam-ni Chief Minister-ko didiataha.