SHILLONG: India a·songni dingtang dingtang biaprango Kristianrangni kosako ong·gija dakanirang batroroengani gimin Bharatiya Janata Party (BJP)-ko matnangna jotton ka·tokengon, Meghalaya a·dokode BJP, darang jat ba toromni gisepo mikkang niteani grian, ma·mong sorkarini on·enggipa scheme-rangko aro pilak namgnirangko on·na jotton ka·enga ine Meghalaya a·dokni BJP dol parakatskaaha.
Congress dolchi sason ka·enggipa Chattisgarh a·doko Kristianrangni kosako kragija dakanina Meghalaya Pradesh Congress Committee (MPCC)-ni president Vincent Pala-ni BJP-ko matnangna jotton ka·skaahani gimin a·dokni BJP dol, kattarangko parakataha.
“Chattisgarh a·dokara Congress dolchi sason ka·enggipa a·dokan ong·a aro Kristianrangni kosako ong·gija dakanina ku·rangko on·ahani gimin chinga Vincent Pala-ko mittelpilna ska. Kristianrangni kosako ong·gija dakanina ua pangnan BJP-kosa matnangna jotton ka·skaenga,” ine BJP Meghalaya Pradesh-ni media department parakataha.
BJP-ni ‘Sabka Saath, Sabka Vikas’-ni gimin janapatengon, ia kattarango pangchake BJP, darang jat ba toromna mikkang niteani grian kamrangko ka·enga ine Meghalaya BJP-ni media department parakataha.
“BJP-ni mikkang niteani gri kamko ka·anichi Meghalaya a·doko lak 2.5-na baten game ge·e cha·giparang, bilsiprakon gong 6000/- tangkarangko an·tangtangni account-rangko man·soaha. Meghalaya a·doko lak 1.5-na baten nokdangrang chi sale on·ako man·aha. BJP sorkarini ning·o Meghalaya a·dokni hajal 60-na baten nokdangrang, nokrangkoba man·aha. Meghalaya a·doko ia namgnirangko man·gipa bang·bata nokdangrangan Kristianrangsa ong·a aro chinga maming dakeba sorkarini namgnirangko on·anio toromni gita baseani dongja,” ine BJP Meghalaya Pradesh-ni media department parakataha.
Chattisgarh a·doko Kristian nokdangrangko aro gilja nokrangko nosto ka·e galani gimin suk ong·gijaniko parakatengon, Chattisgarh sorkariko Indian National Congress (INC)-an chalaienga aro ia Congress sorkari, BJP-kosa matnangna jotton ka·skaenga ine Meghalaya BJP parakataha.
