TURA: Tura-o donggipa Printing & Stationery office compound-o biaprang chu·ongjae dingtang dingtang kamrangko ka·anio neng·nikanirangko chagrongna nangenga ine Government Branch Press Industrial Employees’ Association (GBPIEA) parakatenba, ia office compound-o State Convention Centre-ko rikna a·dok sorkarini manchienganiko raken jegalataha.
GBPIEA-ni secretary Sengment M Sangma-ni parakatani gitade, ia industrial building, jeon dam rakgipa bostu aro ostrorangko donchakachim, ian da·o nosto ong·angengahani gimin gital building-ko rikna nangengahachim aro ia building-o nangani kri kuturirangba dongjae neng·nikanirangko chagrongna nangtokengachim.
“Ia building-o ma·manti bosturangko donchakna gita kuturirangba chu·onga gita dongja aro bosturangko biap man·ao donna nangengani a·selan chirang selpruanichi aro chibrimrangchi nosto ka·ako man·tokenga. Ia sal somoirango gital a·jarangko aro gital block-rangko songengani gimin mikkangchi ia department-ko man·chape dingtang dingtang department-rang, nokrangko rikdapna nangengani gimin biaprangkoba chu·onga gitan donna nangao ga·akenga,” ine GBPIEA-ni secretary janapatenba, ia department-ni technology-rangko namdapatna gitaba aro nokrangnaba a·arangko bang·en donna nangenga ine parakataha.
Ia department-ni da·o gari donchakna donenggipa biapara department-o kam ka·enggipa manderangni aro ma·manti bosturangko ra·na re·baenggipa manderangni garirangko donchakna gitan chu·ongjaenga ine janapatengon, election-ni somoirangode lekka chapa ka·ani kamrang bang·batani gimin ia biapo apchangket ong·anirangko nikna man·taignok ine association-ni secretary parakataha.
Ia office-o da·o dongenggipa chowkidar-ni quarter te·gni baksana deputy director, assistant director aro foreman-ni official quarter-rangko rikna gita ia association, sorkarina proposal-ko on·china gita uamangni official-ko didimanaha ineba GBPIEA parakataha.
“Ia department-o kam ka·enggiparang, Negotiable Instrument Act (NI Act)-ni ning·o ga·akgiparang ong·e hard labour category-o ga·akgiparang ong·a aro ia Act-o dongimin niam gitade ia department-o kam ka·giparangna dingtangmancha rochakani biapkoba on·na nangani gimin dingtang building-ko nangengachim. Chinga Tura-ona State Convention Centre-ko ra·baanikode jegalenga ong·ja indiba chingni kosako janapgimin neng·nikanirangko ma·sichake ia State Convention Centre-ko chingni office compound-o kuligija gipin biapo kuliskachina chinga mol·molatenga,” ine GBPIEA-ni secretary, a·dokni Chief Minister Conrad K Sangma-na sedoataha.
