Adokgre-Ildek ramako name tarija ine songni manderang matnanga

RESUBELPARA: North Garo Hills a·jao Adokgre-oni Ildek Akong songona gital tarianggipa ramarang namsrangjaha maina ia gital black topping on·gipa ramako jakchin kike galna man·aia ine songni manderang matnangataha.
Iani bidingo songni manderang video-rangko ka·e social media-rangoba watpripraataha.
Iani bidingo, ramako tarigipa company-o sing·sandiaton, ia ramara taridaldalgipasan ong·kuengani gimin name ran·kujaesa kike galna man·engakon ine parakatskaaha.
Indake ong·engon, jolo songdongenggipa manderangni parakatani gitade, ia ramani 11-gipa kilometre-ni bakko re·anggipa December 31 tarik Sonibar salo tarimanahachim indiba ia ramako tarimanaoni salgittamni ja·mano uamang nipilon, ia gital black topping on·gipako jakchin akchrake galna man·skaaiahachim.
Ia Ildek Akong-Adokgre ramako World Bank-ni chame on·gipa tangka paisarangchi tariengachim aro ian Meghalaya Integrated Transport Program (MITP)-ni bak ong·e, ia km 11 ong·gipa ramana gong kror 33-mangko chamahachim.
“Ia ramani obostako nike chinga namen suk ong·jaha aro iani bidingo company-ni official-rangnaba u·iataha. Ia ramako indita bilsirangna galchipe donahaoba da·o ia ramako tariengahani gimin chinga songni manderang namen ka·dongsopaengahachim. Ia ramani gipin bakrangko name tariaha ong·ode ia bakkoba name tarina nanga aro chinga indake skatang tarigolgolanikode ra·chakna man·jawa,” ine songni dilgipa saksa parakataha.
Ia rama ta·raken nosto ong·pilgenchimode uamang kachario mokordoma ka·na gitaba songni manderang ka·mikkenataha.