SHILLONG: Meghalaya a·dokni Kyrdemkulai-o donggipa Agriculture College-ni administrative aro academic block-ko Bristibar salo, Union Agriculture & Farmers Welfare Minister Narendra Singh Tomar nokdonggae on·angaha. Ia apsan somoion ua college-ni Girls Hostel-koba nokdonggae on·angjolaha.
Ia Agriculture College-ni gital nokrangko nokdonggae on·angani somoio Union Minister, jinmana aganprakangengon, salgro salaram a·dokrangko a·songni salgi ine toe aganangaha.
“Salgro salaram jolara a·songna mongsonggipa biap ong·a maina ian dingtang dingtang jatrangni songdongchakram biap ong·a. Ia jolo namgipa karirang baksana rotogipa biaprang aro sam-bolrang bang·en donga. Salgro salaram jolara a·songni salgi gita ong·a aro an·ching jotton ka·genchimode Meghalaya a·dokko namdapatna man·kugen,” ine Union Minister, North East Krishi Kumbha 2023 aro Umiam-o donggipa ICAR Research Complex for NEH Region-ni chang 49-gipa foundation day-ko manianioba dongpae aganaha.
Gama ge·ani kamrangara mongsonggipa ong·ahani giminba Tomar, an·tangni kusi ong·aniko parakataha.
“Ia gital chasongo an·ching gital kolrangkoba jakkalna nangengaha. Ia kolrangko India a·songna, Meghalaya a·dokna aro game ge·e cha·enggipa sakantina sokate on·anian an·chingni mongsonggipa daito ong·enga,” ine ua aganaha.
Prime Minister Narendra Modi-ni dilanichi ra·gate on·gipa dingtang dingtang scheme aro program-rangni giminba ia tom·anio Union Minister aganangaha.
“Prime Minister Narendra Modi-ni dilanichi, gama ge·ani pilak kamrangon dakchakanirangko on·enga. PM-KISAN, Fasal Bima Yojana, gital kolrangchi gama ge·aniko ra·doani aro gama ge·ani kamrangna tangka paisarangko dakchake on·anichi a·songo game ge·e cha·enggipa manderang tang·dobana man·engaha,” ine Tomar aganaha.
Gama ge·ani kamrangko aro game ge·e cha·giparangko pangnan mande ra·china gitaba ua didiangaha.