SHILLONG: National People’s Party (NPP)-chi dilenggipa Meghalaya Democratic Alliance (MDA) sorkarini kamo manderang kusi ong·tokjaenga ine MDA-o bakrimenggipa People’s Democratic Front (PDF)-ni working president aro Cabinet Minister Banteidor Lyngdoh a·kangataha.
Adita salrangna skangsan, NPP-o napna gita una gong kror 5 tangkarangko on·achim ineba ua matnangahachim ine nikna man·a.
“MDA sorkarini kamo mitam manderang kusi ong·enga indiba mitam manderangde kusi ong·niktokjaenga. NPP-chi dilenggipa MDA sorkarini kamo manderang kusi ong·tokjaenga ine anga an·tangde agangen,” ine Lyngdoh parakataha.
MDA-o bak ong·pagenchimoba, MDA-ni kam mingantina chanchianiode uamang namnikpaaniko on·jahachim ine PDF-ni president Miguel Mylliem parakatskaaha.
“Sorkarini ong·gija dakgipa dingtang dingtang kamrangna chingaba ku·rangko on·paahachim aro a·doko casino-rangko kulina sorkarini manchianiko chingaba jegalaha. Sorkarini maiba kamrango chinga suk ong·nikjaenga ong·ode chinga pangnan Chief Minister Conrad Sangma-ko gronge iandakgipa kamrangni bidingo agangrikrongachim,” ine Mylliem aganaha.
Assam aro Meghalaya a·dok damgni simarango ong·enggipa golmalrangko namatna ja·ku de·ani bidingo janapatskaengon, ia kamo PDF-kode bak ong·atpajahachim ine PDF-ni working president Banteidor Lyngdoh parakatskaaha.
“Chingkode regional committee-rangoba bak ong·atpajaha,” ine ua aganaha.
Election-na PDF-ni niksamsoanirangko janapatskaengon, ia chango uamang man·a dipet seat-rangko chena jotton ka·enga ine Lyngdoh parakataha.
Election-na skang gipin political dolrang baksa bakrimani gimin janapatskaengon, Nationalist Congress Party (NCP) baksa bakrimchina uamangko didiahachim indiba uamang election-na skang darang political dolrang baksaba bakrimna nangnikani dongja ine PDF-ni working president parakataha.