SHILLONG: Meghalaya a·doko aro mongsongbate skotong Shillong songjinmao gital airport-ko kulina jotton ka·aniara jumango gitasan ong·kuenga aro apsan somoio a·dok sorkari, ia gital airport-ko kuligenma ma Umroi-o donggipa Shillong airport-ko nambate rikgenma, jajakuenga gita ong·enga.
Shillong-o gital aro nambata airport-ko Diengpasoh-o kulina miksonganirang dongachim ine nikna man·a.
Umroi-o donggipa Shillong airport-oba dal·dalgipa sildorengrang bilonna man·na gita adita bilsirangna skangsan ia Umroi airport-ni runway-ko bakrodapatna miksonge a·dok sorkari, DPR-ko tariahachim aro iana korosko hisapon, gong kror 7500-na baten korosrangko nangengachim.
Meghalaya a·dokni skotong Shillong songjinmao nambata airport-ko kulina damgni ba damgittam a·arangko sandichina Meghalaya High Court, a·dok sorkarina ge·etaniko on·on, Diengpasoh-o donggipa a·ako nichina gita sorkari, AAI-na pakwate on·ahachim.
Ia a·ako AAI-ni official-rang niengkua aro airport-na ia biap namama namjawa uko niengkua ine official-rang parakatskaaha.
Da·o dipet kamrangko a·bachengasan ong·engkua aro ia gital biapo airport-ko kulina gita ru·uta somoirangko nangkuaigen ine janapatengon, ia gital biapo airport-ko kulianioba gong kror 7000-mangkon nangaigenchimode gital dake airport-ko kulianio a·dok sorkari bang·en neng·nikanirangko chagrongna nanggen ine official-rang parakataha.
Indake ong·engon, Shillong airport-oniba da·o Kolkata-ko man·chape damsku songjinmarangona sildorengko bilruraatengahani gimin adita namdapaniko nikna man·engaha ine official-rang parakataha.
Da·o dipet Shillong airport-oni Agartala, Dibrugarh, Imphal, Aizawl, Lilabari, Silchar, Guwahati aro Dimapur songjinmarangonaba sildoreng bilruraatengaha ine kobor on·aha.
