SHILLONG: Bristibar salo Meghalaya Legislative Assembly-ni membor ong·aoniko watanggipa Umsning constituency-ni gitcham People’s Democratic Front (PDF) MLA Jason S Mawlong, Sukrobar salo, National People’s Party (NPP)-o napangaha.
Ua Umsning-ni gitcham MDC Donkupar Sumer aro gipin dolrangna kam ka·gipa manderang baksa Umsning-o tom·bimonganiko ong·atanio NPP-o napangaha.
Ia gitcham MLA aro gitcham MDC-ko NPP-ona rimchaksona gita tom·aniko ong·atanio Meghalaya a·dokni Chief Minister aro NPP-ni national president Conrad K Sangma baksana a·dokni Deputy CM Prestone Tynsong, Cabinet Minister Sniawbhalang Dhar, NPP-ni state vice president Donkupar War, NPP MLA Sosthenes Sohtun, NPP-ni ku·wattimgipa Ampareen Lyngdoh aro NPP-ni gipin dilgiparangba dongpae bakko ra·angtokaha.
Ia dilgiparangko rimchaksona tom·aniko ong·atanio NPP-ni national president Conrad Sangma, jinmana aganprakangengon, ia dilgipa sakgnini NPP-o napaniara, Umsning constituency-o namroro silroroaniko ra·bana kam ka·anio bilakbatataniko on·gnok ine parakataha.
Jason Mawlong-ni NPP-ona re·baani gimin janapatengon, ua Umsning constituency-o namroro silroroaniko ra·bana NPP-o ka·dongchakengani giminsa da·alo NPP-ona re·baaha aro ua gnigipa changna MLA ong·e Umsning constituency-ni manderangna dangdike on·na an·tangko tariaha ine Chief Minister parakataha.
Ia chang election-o uko seoktaichina gitaba ua constituency-ni manderangko mol·molangaha.