NEW DELHI: Minority Affairs-ni Union Minister of State John Barla-ni Garo Hills-ona re·bae re·angpilani ja·man da·o Union Fisheries & Animal Husbandry aro Darying Minister Parshottam Rupala, da·al Sombar salo salgnina South West Garo Hills a·jaona sokbaskaenga.
Official-rangni u·iatani gitade, ian uni skanggipa changna South West Garo Hills a·jaona re·baaniba ong·enga.
Da·al Sombar salni bako Union Minister, Ampati-ona sokbaenba, ma·mong sorkarini ra·gate on·gipa dingtang dingtang scheme-rangni bidingo sorkari official-rang aro dingtang dingtang dolrang baksa tom·e chanchirimanggen.
Mongolbar salo ua, jolo donggipa self help group (SHG)-rang, dairy farmer-rang aro na·tok bading chiwalgipa manderangkoba gronge, uamangni neng·nikanirangko sing·sandie ra·anggen ine official-rang parakataha.
South West Garo Hills a·jao donggipa border haat-rangkoba ua re·ange niegen aro border area committee-rang baksa tom·e agangrikanggen.
